New Era Newspaper

New Era Epaper
Icon Collap
...
Home / Omulumenhu vati a fya eshi a yashwa nondjebo

Omulumenhu vati a fya eshi a yashwa nondjebo

2022-06-22  Festus Hamalwa

Omulumenhu vati a fya eshi a yashwa nondjebo
Top of a Page

Omulumenhu weedula 53 omukwashiwana waHolland okwa xulifa eshi a yashwa vati komunhu ehe shivike. 

Otaku hokololwa omulumenhu ou e lituwa a nangala pondje yeumbo laye a xulifa.

Oshiningwanima eshi osha ningwa Omaandaxa efimbo lokomatango modoolopa yaSwakopmund.

Nakufya okwa tongolwa oye Roland Antonius Wilhemus Masoliji.

Omupopiliko wopolifi moshitukulwa Erongo Inspector Ileni Shapumba okwa hokolola ta ti omulumenhu okwe uya keumbo ndele ta kanghameke otuwa yaye kondje yeumbo.

Okudja opo vati okwa ufana omuholike opo e mu patulule shaashi okwa li a hala opaipi yomeva opo a koshe otuwa yaye.

Opolifi oya ti okudja opo okwa tamaka okukosha otuwa yaye omanga omukainhu waye a shuna meni leumbo.

Vati konima yefimbo manga omukainhu waye e li meumbo okwa uda oshiima sha topa kondje yeumbo.

Opolifi oya ti konima yokafimbo omukainhu okwa uda omunhu ta konghola poshivelo sheumbo lavo, ndele te mu yeulula.

Vati omunhu oo okwe mu lombwela kutya ope na omunhu a fila pondje yeumbo lavo a yashwa e li mexungu lohonde.

Omunhu oo a mona olutu lanakufya okwa li ashike ta ende po peumbo lavo.

Okudja opo ova shivifila opolifi kombinga yoshiningwanima eshi nokonima opolifi oya fika.

Omulumenhu vati okwa yashwa eeholo nhatu, momutwe, momesho nokomatako.

Opolifi oya ti motuwa yanakufya omwa hangika eeengodi dopeke nhatu di li mondjato, oshimaliwa N$2 050 nosho tuu.

Kape na omufekelwa a kwatwa po moshibofa eshi onghee opolifi otai indile kwaau e na ouyelele opo a kwatafane nopolifi ile oshiwana shi dengele konomola; 0818114770, Chief Inspector Kandali Uushona.

– fhmalwa@npec.com.na


2022-06-22  Festus Hamalwa

Share on social media
Bottom of a page