Uuministeli womindhingoloko owa kwashilipaleke kutya otau futu omulumentu ngoka a li a monithwa oshiponga kOngandu noshimaliwa N$ 10 000. Omugandji gomauyelele mendiki lyuuministeli womindhingoloko Romeo Muyunda okwati, shoka otaye shiningi ya landula omulandu noompango dho mendiki ndyoka.
“Onkalo yo meya kaagemo mondoolopa yaRundu, oya eta oongandu po pepi, oshoka oshigwana otashi teke omeya okuza momulonga moka muna Oongandu,” ta hokolola ngaaka.
Ta ti, ngaashingeyi onkalo yOongandu mo mulonga moka otayi kondololwa.
Ta gwedhapo ta ti, ongandu ngele oya monika, otayi yahwa okugamena iinamwenyo oshowo aantu taya thiki po mulonga mpoka omolwa ompumbwe yomeya. Muyamba okwakumagidha oshigwana shi yande okuninga iinyangadhalwa ya yooloka momulonga moka ngaashi okuyoga, okuyoga iikutu oshowo okwiiyoga komalutu.
“Ongandu oya nika oshiponga, oshoka ohayi kala ya hala okuponokela aantu aluhe, onkene oshigwana otashi kumagidhwa shi kale sha kotoka,” ta kumagidha. Ta gwedhapo ta ti, onkalo ndyoka ondhigu, oshoka oshigwana otashi tsikile okukatala omeya komulonga hoka, omolwa ompumbwe yomeya.
Otaku hokololwa kutya omulumentu ngoka a ponokelwa noku monithwa oshiponga kongandu okuli monkalo yi li hwepo. Omunamimvo (29) John Nashirere, anuwa kwali a kateka omeya komulonga, ihe ka kwali andhindhilike omainyengo gontumba mo meya.
Sho anuwa aka uva omainyengo okuwete ongandu ya thikama ya fa omuntu yemu taalela, etayi mu nukile noku tula okugulu kwe mo kana.
Otaku hokololwa kutya okwa kala noku kondja okukutha okugulu kwe mo kana kongandu sigo a zimo, ihe ongandu oya kala ye mulandula monima.
“Omulumentu ngoka okwali ta kondjo sigo athiki kooha ndhomulonga hoka a li aka mona ekwatho, okuza kaakwashigwana eta falwa koshipangelo,” ta ti ngaaka. Omulumentu ngoka natango okuli moshipangelo.