WINDHOEK-Omulumentu gwepipi lyopokati okwali api okusa, no itaavulu okutongololwa sho a pile mondunda ye yo ku lala  ongula onene yOlyomakaya gehuliloshiwike lya ziko.

Omugandjimulombo gwopolisi moshitopolwa shaMusati Inspector Lineekela Shikongo okwa hokolola kutya Jason Sem kwa si eso linyanyalitha sho a pi po omanga ali eli megumbo oye awike.
Oshiningwanima shoka oshali sha holoka pomukunda gwedhina Onamhindi, moshikandjohogololo shaKalongo moshitopolwa shaMusati.

Shikongo okwa hokolola kutya aashiinda mboka yali ya ipyakidhila  niinyangadhalwa yawo yomegumbo  na oyali ya uvu omuntu ta kugu nondunda ya Sem ya tema omundilo. “Aashiinda oyali ya tondoka onghugo ndjoka na sho ya thiki pegumbo mpoka oyali ya adha omulumentu ngoka a pya nayi ta kondjo nomwenyo na okwali a hulithile mpoka,” osho a hokolola ngaaka. Okwati ondunda ya nakusa nayo oyali ya pi ya lungwina po na inapu hupa nande osha shali meni moka. Moshiningwanima sha yooloka, moshitopolwa omo tuu moka, moshikandjohogololo shaKahao , okwa hokololwa kutya  omulumentu natango gwepipi lyopokati okwali a tsuwa noshinima shatsa shoka shemweehameke sigo omeso.

 Nakusa okwali a tsuwa montulo  eta sile aniwa poshiponga mpoka . elalakano lyoshiningwanima shoka inali tseyikwa  na ku longa oshikulumuna shoka okwa mangwa po na okwa tegelelwa a holoke mompangu yamagistrata mOkahao mokati koshiwike shika. Oshiningwanima osha ningwa metitano lyoshiwike sha ziko uusiku.