Okaana kokadona keedula 15 oka xulifa eshi ka lyatwa kotuwa Etitano pefimbo lomutenya lwopotundi 13h40 mopate yaKahao pomukunda Uukwedhidhi moshitukulwa shaShana.

Nakufya okwa tongololwa kutya oye Helena Daniel ha fikola pofikola Ontuli Combined School kwa li eli mondodo onhihetatu.

Omupopiliko wopolifi moshitukulwa shaShana Inspector Thomas Aiyambo okwa hokolola ta ti omunafikola okwa li ta tauluka opate eshi pefimbo a lyatwa kotuwa yoJeep. Okwa xulifila ponhele yoshiponga.

Olutu laye ola twalwa kokila yopolifi kOkahao, novakwapata vaye ova shivifilwa efyo laye.

Omushingi okwa patululilwa oshibofa shedipao liheshi loshiningilawina. 

Opolifi oya kunghulila ova shingi veetuwa opo va kale tava yandje omhito kovanafikola opo va tauluke eepate ngeenge tava shingi nomataulukilo ovanafikola.

Opolifi oya kunghulila yoo vali ovadali novahongifikola opo va kale tava lombwele ovanafikola vaha kale tava ende mopate ngeenge tava di kofikola nokukala yoo ve li oupafi ngeenge tava tauluka opate.

- fhamalwa@nepc.com.na