New Era Newspaper

New Era Epaper
Icon Collap
...
Home / Omunafikola koNUST e li kufa omwenyo

Omunafikola koNUST e li kufa omwenyo

2022-10-24  Festus Hamalwa

Omunafikola koNUST e li kufa omwenyo

Omulumenhu weedula 21 oo e li omunafikola koshipupudilo shehongo shopombada shoNUST okwa fya eshi e li kufa omwenyo Etine molukanda Grysblok moWindhoek lwopotundi 11h00.

Nakufya okwa tongolwa oye Ananias Inekela Iimvula kwa li e li momudo omutivali.

Omupopiliko wopolifi moshitukulwa shaKhomas Warrant Silas Shipandeni okwa hokolola ta ti Iimvula okwe li tuwa e li meenhango a fya komukwashiwana ou kwa li ta ende pomuti opo a hangika.

Opolifi oya ti nakufya ina fiya po omukanda tau yandje ouyelele kombinga yefyo laye onghee omakonakono opolifi otaa twikile.

Opolifi oya kumaida ovanafikola opo va kale tava ka konga omakwafo kovaxungimwenyo ile kovafitaongalo ngeenge tava hepekwa koupyakadi wopamadilaadilo shaashi oku li kufa omwenyo ka kushi e kandule po lomukunda.

Tauno Iimvula ou e li xekulu yanakufya okwa ti omutekulu waye ina kala e na oukwatya wokulifa omwenyo onghee okwa ti okwa kumwifwa kefyo laye shaashi efiku olo e li mangela ovapopya naye efimbo longula.

Eshi a kwatafana naKundana omuxungimwenyo koshipupudilo shaIUM a yandje omayakulo exungomwenyo kovanafikola Toini Nakale okwa ti oluhepo ngaashi omhumbwe yoshimaliwa shokufuta ofikola, edopo noshoyo ekwatafano lopaihole ita li enda nawa osho shimwe hashi dulu ovanafikola ve li kufe eemwenyo.

“Ovanafikola vamwe ohava kala valulilwa konghalo ngeenge vehe na ou teva yambidida ongheee eshi ohashi eta opo omunafikola a kale e na oshinyenu,” Nakale ta ti.

Okwa weda po ta ti oku li kufa omwenyo okwa ninga kuhapu unene kovanafikola ve li koipupudilo shopomba onghee okwa kumaida ovanafikola opo va kale alushe tava talele po ombelewa yaye opo va pewa omayakulo exungomwenyo.

- fhmalwa@nepc.com.na


2022-10-24  Festus Hamalwa

Share on social media