Ompangulilo yaMangestalata gwaNdangwa, oya kaleke mondhologo omukulupe gwomulumentu gwomimvo 74, ta tamanekelwa ekwatokoonkondo lyokanona komukiintu gwe komimvo 10.

Otaku hokololwa omukulupe nguka a li a kwatwa po sho anuwa a kala nokukwata koonkondo okanona kokakadhona ka valwa komukulukadhi gwe iikando ya yooloka.

Oshipotha she osha undulilwa komeho nokwa kalekwa mondholongo omolwa unene woshipotha shoka.

Omukuluntu gwopolisi moshitopolwa shaShikoto Teopoline-Kalompo Nashikaku okwa ti omukulupe ngoka anuwa okwa kwata okanona koonkondo iikando ya pita pwiiyali.

Oshiningwanima shoka anuwa osha holoka momukunda Onalukula momundhingoloko gwOnankali. Nashikaku okwa hokolola kutya omukulupe ngoka anuwa okwa kala noku ithana okanona hoka mondunda ye yokulala uuna yina kee mo megumbo noku ka kwata koonkondo.

Opolisi inayi totha mo kutya oshiningwanima shika osha li she ya puuyelele ngiini. Shika oshipotha oshititano shomahepeko tashi ningilwa aanona kaakulupe tashi holoka meni lyethimbo lyoomwedhi.

Oshiwike shazi ko, kOshikoto oko tuu hoka okwali kwa lopotwa oshipotha shekwato koonkondo moka oomwendhi dha piti, omusamane gwomukwakuluntu, anuwa a  kala nokukwata  koonkondo aanona ayehe megumbo. 

Otaku hokololwa kutya   omusamane ngoka anuwa okwali a ningi ethimbo ta ningile uutekulu wuunona omahepeko gopaihulu uulethimbo. Okwa ka manga po sho aanona ya lopotele aalongi yawo. 

Oshiningwanima shika osha li sha tseyika nawa komukulukandhi gwomusamane ngoka, ihe anuwa okwali a tila okushi lopota kopolisi oshoka omusamane oye a li e na iiyemo. Omukulukadhi ngoka naye okwa patululilwa oshipotha. 

Iiwike yapiti, omukulupe omukiintu, gwomimvo 60 naye okwa li a tindilwa eifutilomo sho a dhengagula noku fika okatekulu komimvo 65 kuulumentu sho anuwa ka tindi oku edhilila iimuna. Oshiningwanima shika oshali sha ningilwa moshitopolwa shaHangwena. Omwedhi gwazi ko omukiintu gumwe mOshikoto okwa li a tembudha ko okanona ke kokakadhona komimvo 14 koshitopolwa shaMusati hoka kali taka tekulwa kaakwanezimo yahe, konima sho ka kwata koonkondo komukulupe gwomimvo 60. Omupya omunene okanona hoka kOshikoto hoka ka falwa nako oka ka kwatelwa ko ishewe koonkondo kokamwayinagoka kokamati komimvo 14. 

Omunamimvo 88 ngoka anuwa e li onganga yopamuthigululwakalo naye wo okwa li a tindilwa eifutilomo sho anuwa a kwata okatekulu komukiintu gwe kwali komimvo ndatu. Oshiningwanima shika sho osha li sha holoka moshitopokulwa shaShikoto. 

“Omakwato koonkondo ngoka okwali geya puuyelele sho omulongi gwoposikola mpoka hapu hiti aanona mboka kwali eshi lopota kopolisi,” ta ti ngaaka.

Nashikaku okwa ti oya ndhindhilike kutya aantu oyendji momagumbo ohaya kala yena uuyelele waanona taya hepekwa momagumbo ihe itaye shi lopota kopolisi.

“Shoka itashika pitikwa kopolisi yaNamibia, kehe ngoka ta kala ena uuyelele ihe okwa kala teu holeke, otaka patulilwa oshipotha,’’ ta fatulula ngaaka.

Opolisi moshitopolwa shaMusati oyi li molukongo lwomulumentu ngoka keeshiwike, sho anuwa akwata koonkondo omukiintu gomimvo 22.

Omupehakuluntu gwopolisi moshitopolwa shaMusati Moses Simaho okwa ti, oshiningwanima osha holoka Olyomakaya momukunda Uuthima Womeya momundhingoloko Ogongo.

Omukiintu ngoka anuwa okwa li a ponokelwa komulumentu ngoka inaa koneke koshipala manga a li a lala mondunda ye yokulala. Omulumentu ngoka anuwa okwali a pitile mekende, noku hula omukiintu ngoka iikutu yo kohi, etemu kwata koonkondo.

Omukiintu ngoka ota ti, anuwa ina koneka omulumentu ngoka koshipala oshoka okwali kwa luudha. vkaapanda@nepc.com.na

Caption: Omukulupe gomimvo 74 a tindilwa ombooloha sho ta tamekelwa ekwato koonkondo lyokanona komimvo 10.