Omunandholongo gwoomvula 50 mondholongo yaEast London okwa si komukithi gwoCovid-19, osho ombelewa ndjoka ya li ya tseyitha ngaaka mOmaandaha. Omupopiliki gwombelewa ndjoka Singabakho Nxumalo okwa ti omunandholongo okwa li a si momasiku 20 Mai. Nxumalo ta ti aanambelewa yondholongo ye li 246 osho wo aanandholongo 473 oya kwatwa komukithi nguka. Okwa li a popi kutya moWestern Cape omwa li ishewe mwa gwedhwa aantu omugoyi, aanambelewa yondholongo ya kwatwa omanga moEastern Cape mwa likwa gwedhwa omuntu gumwe ngoka wo naye omunambelewa gwetonatelo lyondholongo. 

Ominista yuundjolowele Zweli Mkhize moSoondaha okwa li a koleke kutya omwaalu gwaantu moSouth Africa mboka ye na ocorona ogu li po 22 583, moka ye li 429 ya sa. Aantu mboka ya aluka oye li 11 200.
Aantu ye li 583 855 oya konaakonwa sigo oompaka.