New Era Newspaper

New Era Epaper
Icon Collap
...
Home / Omuniilonga gwaNored a fumbikwa

Omuniilonga gwaNored a fumbikwa

2022-05-10  Victoria Kaapanda

Omuniilonga gwaNored a fumbikwa
Top of a Page

Engathithi lyaantu omayovi Olyomakaya ga zi ko, okwa li lya gongala momukunda Okalunga Kantako moshitopolwa shaShana, lya thindikile omuniilonga gwehangano lyokwaandjaneka omalusheno Nored oshowo omunangeshefa gwomonooli Thomas Matanga gaLot Shikomba.

Shikomba okwa li a fumbikwa kengathithi lyokuume ke, aaniilonga pamwe naye oshowo aakwenezimo, moshikandjohogololo Ompundja. Omulumentu ngoka a li a si omanga e li miilonga, otaku hokololwa kutya okwa li a gu kopaala nokusa ethimbo olyo tuu ndyoka, mondoolopa yOkahao moshitopolwa shaMusati.

Mboka ya li ya dhimbulukwa Shikomba esiku lyehupulitho oshowo esiku lyefumbiko, oya li ye mu tangele iilonga ye iiwanawa kwa li   ha  longo.  Omunageshefaoshowo  omukuluntusikola nale posikola Okapolo Combined, Gabriel Uunona okwa li a popi esiku ndyoka ta ti, omulumentu ngoka okwa li omuntu gwaantu.

“Esimaneko lya li momulmentu ngoka, okwa li lya pama. Shikomba ita piti p ngoye inee ku popitha omanga inaa hita mondjato ye. Okwa li natango ha ningile aanamukunda ye omauwanwa ga yooloka. Ngele onda indile mu thikame amuhe mwa longelwa omauwanawa, kape na ngoka taka thigwa a kuutumba,” ta popi ngaaka. Omushiinda gwe oshowo kuume ke okuza kuushona Sam Nakatopi okwa popi ta ti, yo naShikomba kakwa li ashike ookuume, ihe oya ka ninga aamwayinathana omolwekwatathano lya pama lya kala lyi li pokati kawo.

“Omulumentu ngoka ita tangwa sho kee ko we, ihe ota tu mu tanga omolwa iilonga ye iiwanawa a li ha longo. Shikomba okwa li oshiholela oshiwanawa unene kwaamboka opo taya koko, ye okwa li omulumetu omuvuliki oshowo omuleli,” ta tanga ngaaka.

Omuniilonga pamwe naye Esther Kasheeta okwa dhimbulukwa Shikomba onga omulumentu gwomashendjo. “Uuna Shikomba ta popi, hakehe gumwe ha itaala shi ta popi oshoka kehe shimwe ohe shi ningi po omashendjo, osho kwa li tu mu shile ngaaka. Omayego ge kakwa li haga puko kombanda aluhe ota imemeha ashike,” ta popi nomahodhi taga mbomboloka.

Omupopiliko nomugandji gomauyelele mehangano lyoNored Simon Lukas okwa ti, Shikomba okwa li omuniilonga omuvuliki. Ta ti, omuniilonga gwawo okwa li a si moshiponga shi nyanyalitha omanga a li miilonga momasiku 27 gaApilili nuumvo. ‘’Okwa li a gu kopaala, ndjoka ya li ya teka pekota oshoka okwa li ya kulupa mo mevi, no kusa ethimbo olyoo tuu ndyoka. Omwenyo gwaShikomba nagu vululukwe nombili,”ta hekeleke ngaaka.

– vkaapanda@nepc.com.na


2022-05-10  Victoria Kaapanda

Share on social media
Bottom of a page