New Era Newspaper

New Era Epaper
Icon Collap
...
Home / Omunyasha omunafalama te shi enditha nawa

Omunyasha omunafalama te shi enditha nawa

2022-09-01  Aletta Shikololo

Omunyasha omunafalama te shi enditha nawa

Omunafaalama gwiikwamboga oshowo iiyimati okwa ti, oshikunino shoka kwa li a toto po omanga e li mondondo 8, ote shi enditha nawa notashi mu yambidhidha nawa.

Martin Ambunda gomimvo 25 gomumukunda Okatale moshitopolwa shaShana okwa ti okuninga omunafaalama osha kala ondjodhi ye, naashika okwa li sha yi miilonga sho kwa li a ndopa ondondo ye yahugunina mo2017.

“Oshikunino shandje otashi ithanwa “Ambunda Trading,” moka ndi na iikwamawawa, omiti oshowo iiyimati niikwamboga,” ta ti ngaaka.

 Ta ti, nonando a li a tameke oshikunino she onga oshiholelwa, nena oshikunino she otashi humu komeho nosha talika ko oshikunino shimwe shomwaambyoka iinene momundhigoloko gwawo.

Ta gwedha po ta ti, nonando ta pandula ngaaka kape na oshinima kashi na uuwinayi.

“Onkalo yAanamibia taya landa iikwamboga nenge iiyimati kondje yiilongo omanga hayi monika moshilongo shetu oya nyenge ko ngaa kongeshefa yandje,” ta ti ngaaka.

Ambunda ta ti, epangelo olya kala noku kumagidha oshigwana shi ye po niikunino okuyanda onkalo yondjala moshilongo, naashika osha Ii wo she mu pe omukumo opo e ye po noshikunino she mwene, oshowo okutsakaneka epangelo ondjilakati.

Ta ti, moshikunino she oku na mo iiyimati ngaashi omamango, omabanana, omapapaye, niikwawo oyindji. Niikwamboga ngaashi omboga yanakanena, omakunde, iilya ,omatama oshowo iihakautu.

“Shika okwa li e shi pondola sho a kala ta gongala iigongi okupulakena oshowo okumona uuyelele nkene e na okukaleka po oshikunino she,” ta ti ngaaka.

Ambunda ta ti, uunongo wopetameko okwa li e u mono sho kwa li a dhewulwa kuuministeli womayambulepo goondoolopa nuushayi, oshowo sho a kala ta gongala miigongi yontumba yi na sha niikunino.

Ta gwedha po ta ti, okugongala hoka okwa li kwe mu yambidhidha poompito odhindji, oshoka okwa li i ilongo mo oshindji.

“Nonando kakwa li nda mana eyilongo lyandje mosikola, okwa li Nde shi pondola sho nda dhewulilwa okuya po nokukaleka po oshikunino,” ta ti ngaka.

Ta ti, okwa ndhindhilike kutya uunafaalama owu na ongushu, unene mokuyambindhidha aanyasha.

“Uunafaalama otau vulu okugandja iilonga kaanyasha oyendji, unene pethimbo ndika lyoompito dhiilonga tadhi nyangwaanyangwa,” ta kumagidha ngaaka.

Ta ti, nonando omashongo ga yooloka oge na okukala mondjila, shoka shi na oshilonga okulonga nuudhiginini sigo wa sindana.


2022-09-01  Aletta Shikololo

Share on social media