Omunambelewa wopolifi weedula 25 a longele koshitaashi shopolifi kOndangwa okwa monifwa oshiponga eshi vati a ponokelwa nokudengwa kovashiwana.

Oshingwanima eshi osha ningwa mexuliloshivike kolukanda Okangwena mOndangwana lwopotundi 22h00.

Nakuninga oshihakanwa okwa li a twalwa koshipangelo shaNandjokwe ashike paife okwa lekelwa mo nokuli monghalo i li xwepo paife.

Omupopiliko wopolifi moshitukulwa shaShana Inspector Thomas Aiyambo okwa hokolola ta ti nakuninga oshihakanwa okwa li tashingi otuwa yaye yopaumwene tadi keumbo.

Vati komesho yaye okwa hanga ko otuwa i li mondjila yakanghamekwa novanhu ve li po tava nu omalodu.

Opolifi oya hokolola tai ti omulumenhu oo okwa pula ovanhu opo va kufe po otuwa yavo yee a dule a pita po ashike vati ova tameka okutuka nakuninga oshihakanwa tava ti kutya itava di po.

Vati ovafekelwa ova ponoka ko ndele tave mu denge nomamanya nokumonifa oshiponga.

Okudja opo nakuninga oshihakanwa okwa umba ondjebo mombada ndele ovafekelwa tava faduka po nokonima okwa dengela ovapolifi vakwao opo ve uye ve mu twale koshipangelo.

Ke pena omufekelwa a kwatwa po fiyo opapa onghee omakonakono opolifi otaa twikile.

Oshiningwanima shikwao, ovapolifi vavali navo ova ponokelwa koolyamupombo ve kwete omakatana neembele tava pula oimaliwa mOngwediva efimbo loufiku.

Opolifi oya hokolola tai ti ovanambelewa vopolifi ova hangika tava twala vakwao keumbo konima eshi va dimbuka oshikofa youfiku.

Vati manga va kanghameka otuwa yavo okwa dja ovalumenhu vavali tave va ningile omatilifo va hala okuvateta nomakatana.

Ka pena omupolifi a monifwa oshiponga shaashi opolifi oya endelela diva i dengele vakwao onghee ovafekelwa ovakwatwa po.

Eshi a kwatafana naKundana komufala wopolifi moshitukulwa shaShana Commissioner Naftal Lungameni Sakaria okwa kunghilila oshiwana opo shi xulife po okukala tashi ponokele nokulwifa opolifi.

Okwa ti omukwashiwana keshe ta ka lopotwa ta lwifa opolifi ota kala a kwatwa po diva opo a pewa ehandukilo lopaveta.

fhamalwa@nepc.com.na