New Era Newspaper

New Era Epaper
Icon Collap
...
Home / Omupolisi a mangwa ta yakele iingangamithi mongali

Omupolisi a mangwa ta yakele iingangamithi mongali

2024-05-28  Victoria Immanuel

Omupolisi a mangwa ta yakele iingangamithi mongali

Omupolisi ngoka a mangwa ta yakele iingangamithi mondholongo yaShakati okwa pewa eyifutilemo N$1 000 sho a holoka mompangu ohela.

Omukuluntu gwopolosi moshitopolwa shaShana Naftal Lungameni Sakaria okwa ti omulunentu gwedhina “Shigwedha” ngoka ha longele mosasiona yaShakati okwa mangwa oshiwike sha zi ko nokwa lalekwa miilonga pakathimbo.

Oshipotha she osha undulilwa kuKotomba nuumvo.

“Shigwedha okwa mangwa nokanayilona okaluudhe ke na iingangamithi yi na ondjundo yookilogalama 35 yongushu N$1 750 oshowo omakaya goYes ge li 77 gongushu N$154, pethimbo e li miilonga,” ta hokolola ngaaka.

Sakaria okwa ti onkundana ndjoka otayi sitha ohoni, omupolisi ta yakele iingangamathi mondholongo omanga oye e na okukeelela iimbuluma.

“Aanadholongo ngele otaya pewa iingangamithi mondholongo nena otaya piyagana momadhiladhilo e taya longo iilonga inaayi uka,” ta ti ngaaka.

Ta ti, shoka natango otashi vulu okweeta evundakano mondholongo nenge okutula oonkalamwenyo dhaapolisi moshiponga.

Ta gwedha po ta ti, opolisi otayi tsikile okulonga nuudhiginini okukwashilipaleka iiningwanima itaayi hokitha mopolosi itayi holoka we.

“Otandi pandula aapalosi mboka taya longo nuudhiginini oshowo nuuyuki okukeelela iiningwanima ngaashi mbyoka ningwa komupolisi omukwawo,” ta pandula ngaaka.

Sakaria okwa ti omumvo gwa zi ko natango omupolisi gumwe mOshana okwa li a patululilwa oshipotha shelongitho lyiingangamithi oshowo okukonda oompango dha tulwa po okukondolola iikwamakaya.

Sakaria okwa ti oshiningwanima shoka osha holoka omanga omulumentu ngoka a li e li miilonga moshitaasi mOndangwa.

 

Otaku hokololwa kutya omupolisi ngoka okwa li i iyaka mehala lye lyiilonga ndyoka lyi li kokule kashona nondjedhililo yanaandholongo hoka anuwa a adhika kaapolisi aakwawo, nooondjato dhombulukweya dha tumba.

Sakaria ta ti, shoka anuwa kwa li sha limbililike aapolisi aakwawo ooshoka omayinyengo ge ga li ga tameke okulimbililika.

Omupolisi ngoka anuwa okwa li a kambandhala okumatuka po sho a pulwa kutya ota ningi shike kombinga hoka e ta tidhwa sigo a kwatwa.

-vkaapanda@nepc.com.na

 

Caption: Iingangamithi… Omupolisi a mangwa sho a li ta kambadhala okuyakela iingangamithi mondjedhililo kOshakati.

 

Efano: Otali ulike ashike

 

 

 

 

 

 

 

 


2024-05-28  Victoria Immanuel

Share on social media