Omumati gumwe mOshakati otaku hokololwa a ningi omunelago sho kwa li a patukununwa miikaha yaafuthi komunambelewa gwopolisi omukulu.
Otaku hokololwa omulumentu omunyasha a li a ponokelwa kaalumentu yahamano nelalakano lyoku mu yuga okompiuta yopeke.
Elago enene pehala mpoka opwa adhika tapu piti ohauto yaangoka a li omupopiliko gwopolisi koshitopolwa shaHangwena Kaume Itumba, ngoka a eta opo aafuthi mbaka ya lye ongaku yu uka koombinga dha yooloka, noku thiga po ohauto yawo.
Oshiningwanima shoka osha holoka komatango gOmandaaha konima yosekundosikola Iipumbu mOshakati.
Sho a dhengelwa kuKundana Itumba okwa ti okwa ndhindhilike omukwashigwana ta monika e li moshiponga, nokwa li a kutha ondjembo e ta lombwela aalumentu mboka ya kankame. ‘’Aalumentu mboka okwa li ya matuka po kehe gumwe a kutha ondjila ye, elago enene okwa li tapu ende opolisi ndjoka ya li mopatolola. Opolisi okwa li ya tsikile okutidha aalumentu mboka,’’ ta hokolola ngaaka. Omugandji gomauyelele gwopolisi moshitopolwa shaShana Frieda Shikole okwa ti opolisi okwa li ya pondola okukwata po gumwe gwomaafekelwa, omanga yatano inaaya monika. Ohauto ndjoka ya thigwa po kaafuthi anuwa oyi na onomola yokomeho noyokonina inaadhi faathana.
Mohauto moka omwa li wo mwa adhika omakatana, oombele niikwawo oyindji.
Omukuluntu gwopolisi moshitopolwa shaShana Naftal Lungameni Sakaria okwa ti, ngaashi a kala te shi popi okupitila miikundaneki kutya itaka thiga emanya lya londa kekwawo, oshitopolwa shaShana otashi tsikile okulwitha iimbuluma.
“Nonando oondholongo kadhi na iikulya dho natango odhu udha out na okuya tula mo ashike, oshoka itaya ihumbata nawa,’’ Sakaria ta ti ngaaka.
Ta gwedhapo ta ti, omulumentu ngoka okwa mangwa ihe natango oku na okupopya yakwawo mboka a li nayo, opo nayo ya mangwe oshoka otaya ka tsikila okulonga iilonga hayo moshigwana.
Ta ti, ota pandula kehe ngoka a li a yambindhindha opo omulumentu ngoka a gamenwa okuningilwa omiyonena kaalumentu mboka. “Oshigwana nashi tsikile okulongela kumwe nopolisi, okulopota iiningwanima yoludhi ndoka, oshoka opolisi aluhe oya ilongekidha,’’ ta kumagidha ngaaka.
Sakaria okwa kumagidha wo oshigwana shi hulithe po oku enda niinima yongushu yi li pombanda mokati kaantu.
Ta ti, omukalo ngoka ohagu hili aafuthi opo ye ya ponokele.
‘’Okompiuta yopeke hayo yoku endiwa nayo peke, nenge komuntu e li koompadhi,” ta ti ngaaka. “Otwa ndhindhilike wo natango aakiintu taya ende mokati kuusiku, omanga ye na oongodhi dhopashinanena, oshinima shoka osha nika oshiponga,’’ ta ti ngaaka.
vkaapanda@nepc.com.na