New Era Newspaper

New Era Epaper
Icon Collap
...
Home / Omuti gwokutuntila J & J gwa thiki miitopolwa ayihe yoshilongo

Omuti gwokutuntila J & J gwa thiki miitopolwa ayihe yoshilongo

2021-09-23  Victoria Immanuel

Omuti gwokutuntila J & J gwa thiki miitopolwa ayihe yoshilongo

Omuti gwokuntilwa okulwitha omukithi tagu dhana onkandangala muuyuni gwoCovid-19 gwedhina Johnson Johnson ngoka hagu tuntilwa ashike oshikando shimwe ogwa thika miitopolwa ayihe yoshilongo mOmaandaha.

Uuministeli wUuhaku nonkalonawa, owa pititha uuyelele kutya omuti ngoka hagu tuntilwa ashike oshikando shimwe kagu na nando uupyakadhi washa.

Namibia okwa mono uukende wu li 108 000 wo-J&J, mboka wa gwedha komiti omikwawo dhokutuntila okukeelela nokushonopaleka ompito yomukithi ngoka.

Sigo oompaka aantu ye vule 4 000 oya kanitha oomwenyo dhawo, omolwomukithi ngoka, noopelesenta odhindji dhaantu ya hulitha indhi tuntilwa.

Minista guuhaku nonkalonawa Kalumbi Shangula okwa ti omiti dhokutuntila odha ninga odhindji, nodha andjanekwa komahala agehe moshilongo, okugandja ompito kukehe gumwe a tuntilwe.

“Otandi tsikile okukumagidha oshigwana shi ka tuntilwe. Okutuntilwa oko ashike taku ku hupitha nokushonopeka omwaalu gwaantu taya kwatwa komukithi ngoka omudhigu,” ta kumagidha.

Ta ti, oya ndhindhilike omwaalu gwaantu taya tuntilwa tagu shuna pevi miitopolwa ayihe, omolwomauyelele taga taambathanwa kaage li mondjila.

Kalumbi okwa popi kutya omiti dhomaludhi agehe ga taambwa moNamibia otaga adhika momahala guuhaku, mpoka pe na omatuntilo.

“Omuti ngoka gwo-J&J ogwa kondololwa nawa kutya kagu na uupyakadhi ngaashi omiti omikwawo dha taambwa tango moshilongo shetu. Onkene ehogololo olyoye mwene okuhogolola kutya oto tuntilwa nomuti guni,” ta popi ngaaka.

Uuministeli wuuhaku owa ndhindhilike aantu oyendji taya tutswa omolwomatalelepo gwokondje yoshilongo.

Taya ti, kehe ngoka ta zi moshilongo, na itutsithe ye mwene, oshigwana inashi lundulula omalandulathano noompango dha tulwa po.

Laimi Shikalepo ngoka a wendwa owenda yo-J&J Etiyali okwa ti sigo oompaka ina uva sha sha lunduluka molutu lwe.

Ta kumagidha oshigwana ta ti, mboka taya ti, itaya tuntilwa otaya iningililemo. 

“ Aantu hasho haya dhipagwa ngaaka. Omiti ndhoka hatu nu ngele twa pewa koshipengelo ohadhi zi peni, nenge ndhoka hatu landa kooapiteka?,” ta pula.

Ta ti, kamu shi mpoka hadhi zi, ihe ohamu nu mwa mwanguluka, oshike tashi mu titilitha okuwendwa.

Shikalepo ta ti, indeni mu ka tuntilwe mu kaleke po oonkalamwenyo dheni, omu na oshilonga natango kombanda yevi.


2021-09-23  Victoria Immanuel

Share on social media