Omata gotango gomvula ga loko kiitopolwa yokuuninginino konooli oga eta omukumo maanafalama yomomapya oshowo yiimuna, mboka ya li ya sholola komvula itaayi loko.

Omvula oya loko lwotango nuumvo, miitopolwa yokuuninginino koMusati oshowo kOshana. Ohangwena nOshikoto oya li ya talelwa po komata omashona  iiwike ya zi ko.

Kundana sho ayi moonkundathana naanafalama yamwe, oyendji otaya ulike ye na omukumo omanga yamwe ya pandula nokuligolela omata gotango.

Iikogo oya ningi esiku tayi gandja omukumo, ihe okupendukila Etine omata okwa li ga idhenge pevi.

Nonando omvula kakwa li oyindji ngaashi aanafalama ya li ya inekela, oya talameka omeya miishana yimwe.

Kansela goshitopolwa shUuvudhiya Timoteus Shivute, moonkundatha naKundana okwa ti, omadhiilaadhilo guumbanda okukanitha iimuna yawo omolwondjala otaga ende taga kana, omolwomoloka gwotango.

“Omata ngoka otaga ulike kutya otwa tegelela omvula oyindji. Omvula itayi vulu okuloka ashike lumwe ee tayi mwena. Ondi inekela kutya otatu ningi aanelago,” ta popi ngaaka.

Shivute ta ti, ngele omvula oya loko natango iikando iyali nenge itatu momasiku tage ya, omwiidhi nago otagu ka kala gwa tsapuka nawa, niimuna oto yi imonene kokule.

Hilma Shikoyeni gomomukunda Uukwangula okwati, omvula ndyoka yaloko oya eta omukumo maanafalama yomo mapya. 

Ta ti oya tegelela ashike ku ze natango omata gamwe, opo ya longekidhe oombuto dhiilya yawo.

“Onda kundana okupitila mooradio kutya iitopolwa yimwe moshilongo oya mono omvula oyindji, ihe shoka natango otashi tu pe omukumo kutya natse otatu ka mona omuloka omwaanawa momasiku twa taalela,’ ta ti ngaaka.

Nangula Thomas gomOshakati okwa ti, oya uvu nawa komvula sho yaloko, nondoolopa nayo oya talalelwa nawa.

“Otatu pandula komuloka omwaanawa, nonando hago lela gwa pumbiwa kaanafaalama, omwaanawa nomondoolopa,” ta pandula.

Aanafalama yomomapya mboka inaaya tameka okulonga momapya gawo oyati, oya tegelela omoloka gwalandulako opo ya pulule omapya gawo.

Taya ti, nonando ya mona omukumo, uumbanda inau hulapo thiluthilu, ngele omvula inayi loka natango otaya hepitha iimaliwa yawo.