Victoria Kaapanda

Minista muuministeli wuundjolowele nonkalo nawa Kalumbi Shangula okwa tula miilonga eshina enene lyokugandja ombepo yokufundhitha moshipangelo shaNandjokwe mehuulilo shiwike, moshitopolwa shaShana.

Eshina ndyoka okwa li lya gandjwa kepangelo lyaUSA okuputila moUSAID Etitano lya zi ko mOndangwa.

Shangula sho a taamba ko eshina ndyoka peha lyuuministeli okwa ti, eshina ndyoka olyo limwe lyi na oshilonga no tali ka dhana onkandangala onene monkalamwenyo dhaanuumvu oshowo okukwathela aantu yeli mompumbwe yomifundho.

“Eshina ndika otali eta omalunduluko muuministeli wetu wuuhaku, oshoka aantu otayaka yambindhindhwa nomifundho,” ta ti ngaaka. Ta ti eshina ndyoka ohali yalula 1300 litela momunute gumwe. Ta gwedhapo kutya natango omukithi gocorona inagu hula, onkene iipangelo oyili mompumbwe yomifudhitho, okuyambindhindha mboka taya ka kolota ombinzi,” ta ti ngaaka. “Ethimbo omukithi gocorona kwali gwa ligalala moshilongo iipangelo okwali ya kolota iifundhitho, sho shoka epangelo tali tsikile okumbadhala okukongela iipangelo hayi kala mombumbwe, iifundhitho,” ta ti ngaaka.

Omashina giifundhitho ohaga kwathele oyendji, haya kala ya kolota omifudho uuna yanyengwa kokufudha kopashitwe. Shangula esiku ndyoka natango okwa tothamo kutya moNamibia omwa monika omukithi goH1N1 okuza muJuli nuumvo.

“Iipotha yili 53 oya monika miitopolwa ngaashi Otjozondjupa,Khomas oshowo Kavango east,” ta ti ngaaka. Ta ti omukithi ngoka ohagu kwata unene aanona yeli kohi yomimvo ntano oshowo mboka yena aakwiita yolutu ya wika.

Ta fatulula ta ti omukithi ngoka hagu taandele unene okupitila mokukolola oshowo mokutishima, ohagu keelelwa momukalo gwafaathana naangoka goCovid-19.

Oshipangelo shOnandjokwe o shimwe shomiipangelo inene monooli shoka sha kala hashi yakula aanuvu okuza kiitopolwa ya yooloka monooli. Ngoka ali a popi peha lyoshipangelo shaNandjokwe esiku ndyoka okwa ti oya pandula no tayaka longithwa eshina ndyoka okuyakula ayehe mboka taya ka kala mompumbwe.