OSHAKATI - Nandjenda kadhi uluma nando mu thiga po ote ya, emanya lyokolonela miikwamaudhano lya ka dhilongela, Johannes Shekutamba Mathew a kanduungila nomikala dhegulu.

Oshimpungu shomaudhano moNamibia osha li sha haluthwa konkundana yeso lyomupevipresitende gwongongahangano yoAteletika ngoka a li a thigipo uuyuni mbuka momasiku 25 ga January 2019 moshipangelo shaShakati mepipi lyomimvo 38.
Mathew oku li a dhana onkandangala moshikondo shomaudhano unene tu sho Ateletika moka a li omumatuki, nokonima sho a li a tsilike oongaku dhe dhokumatuka okwa li i itsike omutenge gwoku kwathela aamatuki opo ya mone oompito dhaandjuka nomadhewo gwoateletika.

Ohole yuudhano noyoshigwana oya li ya thiminike Mathew opo a tote po okalaba yaamatuki ndjoka sigo onena yi li tayi humu nawa komeho

 Aamatuki ya tseyika nawa moshilongo ngaashi  Salmi Nduuviteko, Lavinia haitope, Moses Claudia, Sophia Nambambi, David Ndeilenga Sam Shimpanda, Johaness Nambala,Lahija Iishitile osho wo yalwe oya li ya pitile kombunda ya Mathew oku ya pamuthika gwopawuyuni.

Kakele kaamatuki yomoshilongo Mathew okwa li wo ha kwathele aamatuki yalwe yaza miilongo ya yooloka muuyuni mboka haya kala ya hala okulongitha onkalombepo yaNamibia okwiidhewulila omawudhano ga yooloka oku ya monena olweedhe lwo ku kala manga taya ningi omadhewo gawo.

Elizabeth Tororey okwa li gumwe gwomwaamboka ya li ya tumu omatumwalaka gawo okupitila kepandja lyaMethew lyoSocial Network moka a li a holola nkene Mathew a li a edhilile omwanamati gwe Emmanuel Tororey omuKenya ethimbo nuule pethimbo a li ti ilongekidhile omawudhano gwopawuyuni omvula ya za ko.
Okwa li a kwathele aatoolinkundana yomawudhano oku ya pa oonkundana dhomawudhano dhi li pethimbo na kali nando ena uudhigu oku popya niikundaneki.

Okwa li omunashipundi gwo Ateletika mOshana uule womimvo heyali,Mathew pethimbo a li ha matuka okwa li a matuka kohi yoKalaba yoSunshine moka ta ku hokololwa kutya omudhewuli gwe okwa li Bravo.
Pethimbo a li a zi momwenyo okwa li omupevi President gwolutu ta lu wilike omawudhano moNamibia, ota ku hokololwa kutya iilonga mbika Mathew okwa li eyilongo onge omwiiyambi n aka ya li nando ha yi mu etele okathilinga kasha.
Oshituthifumviko she osha li ko ohela okuzilila pomukunda gwawo Onalukekete moshitopolwa shaMusati.