New Era Newspaper

New Era Epaper
Icon Collap
...
Home / Ondado yeelefa itai ka wedelwa

Ondado yeelefa itai ka wedelwa

2021-06-21  Festus Hamalwa

Ondado yeelefa itai ka wedelwa
Top of a Page

Omupopiliko moministeli yeendjila noyeendifo Julius Ngwenda ota ti ondado yeelefa itai ka wedelwa tuu nande, unene tuu pefimbo eli omwaalu wovafaalelwa wa ngambekwa molwoCovid-19.

Meenghundafana a ninga naKundana Ngwenda okwa yelifa ta ti ope na onghundana tai dana onghandangala kutya vati ondado yeelefa oya wedelwa paife. Onghee okwa ti eshi kasha li mondjila nande, yee ta ti oministeli yavo inai koleka opo ondado yeelefa i kale ya wedelwa.

“Ohandi kunghulile ovashingi veelefa opo vehe shi etekele okufutifa ovatwaalelwa oshimaliwa shopombada. Oministeli yetu inai shi pitika tuu nande,” Ngwenda ta ti.

Okwa denga omufindo ta ti keshe omushingi ou ta ka futifa ovanhu oshimaliwa shi li pombada ota ka katukilwa onghatu yopaveta.

Onghee okwa ti oshiima eshi nashi mone exulilo, shaashi osha nyika oulingilingi.

“Oshiwana xulifo po okukala tamu landula omauyelele oipupulu. Ngeenge ope na sha shimwe mwa hala okupula kaleni tamu kwatafana nopolifi ile mu dengele keengodi detu opo mu kale mwa kwashipaleka kutya omwa mona ouyelele womondjila,” Ngwenda ta ti. Ngwenda okwa ti moule womafiku e li 14 aa a tulwa po, omalinyengo ovanhu a ngambekwa moshilongo ashishe inashi pumbiwa ondado yo yeendifo i kale ya wedelwa manga.

Onghee okwa ti ngeenge ondado otai ka wedelwa oshiwana shi na okushiivifilwa pambelewa koministeli yavo.

Okwa denga omufindo ta ti ovashingi nave liufe komwaalu wovanhu ou wa pitikwa okukala wa londekwa.

“Natu liufeni komilandu doCovid-19 edi da tulwa po shaashi omufiki ou owa nyika oshiponga neenghono,” Ngwenda ta ti.


2021-06-21  Festus Hamalwa

Share on social media
Bottom of a page