Elelelo lyondoolopa yaNdangwa olya kutha ko oongaku opo li opaleke ondoolopa ayihe koonono oshiwike.
Eopaleko lyondoolopa olya tameke Omandaaha no tali ka hula Etitano.
Omugandji gomauyelele melelo lyondoolopa yaNdangwa Petrina Mutikisha okwa ti, oosikola mondoolopa yawo oshowo aakalimo oya kutha ombinga.
“Ombanga yo Bank Windhoek oshowo ehangno lyOlthaver and List oya yambindhindha niikunwa oshowo oshimaliwa okulongekindha eopaleko lyondoolopa.
Mutikisha okwa kunkilile omuthindo kutya ekako oshinima oshiwinayi onkene uuyogoki nawu kale oshinima sho tango.
Eopaleko ndyoka hali ningwa omvo kehe, olya li lya longekidhwa kelelo lyondoolopa yaNdangwa no kwali lya ningi oomvula mbali inali ningwa omolwa omukithi gocorona.
“Uuyogoki owa simana onkene oshigwana oshi na okukala tashi opaleke omalukalwa gasho oshowo omidhingoloko dhasho opo kuyandwe omikithi tadhi vulu okupitila moongaga,” ta popi ngaaka.
Ta kumagidha oshigwana shaNdangwa kutya, nashi kale sha tula uuyogoki komeho.
“Ondi inekela kutya kehe gumwe okwa hala ondoloopa ndjika yi hume komeho, pamukalo gwomayakulo gayooloka, ihe shoka otashi ningwa ashike uuna ondoolopa ya yela, oshoka kape na ngoka ta hala, oku eta ehumo komeho mehala lya gagala,” ta ti ngaaka.
Mutikisha natango okwa kumagidha oshigwana kutya, esiku ndyoka ina li kala olyo ta li opalekitha ondoolopa yaNdangwa, ihe nashi kale onkalondjigilile noshi holelwa sho ku opaleka aluhe.
Ta gwedhe po ta ti, okwa nyanyukilwa aakalimo yoNdangwa sho ya kutha ombinga oku opaleka ondoolopa yawo, yo natango naya tsikile sigo esiku lyahugunina.
“Ondoolopa otayi kala ombwaanawa uuna ya yela, onkene otandi, tsikile okukumagidha oshigwana shaNdangwa shi kaleke po uuyogoki,” ta popi ngaaka.
Ta ti, kehe gumwe na kaleke ehala lye lya yela, opo shi kale oshi holelwa sha kehe gumwe.
Mutikisha okwa tothamo omahangano ngoka ga yambindhindha moku opaleka ondoolopa ngaashi FNB, Nedbank, Coca-Cola, Plastic Packaging, Henning Crushed, Pala Trading cc oshowo Ondangwa Private Hospital.
- vkaapanda@nepc.com.na