WINDHOEK-Ominista yOmidhingoloko nOmatalelopo Pohamba Shifeta okwa hokolola kutya olugumbo lwondhalate yokashana kedhina Etosha National Park otayi pewa esimano miinyangadhalwa mbyoka yi na okulongwa nuumvo.
Okwa popi kutya opoloyeka oyo tuu ndjoka otayi langekwa momasiku 22 gaFebuluali nuumvo moka aaniilonga yomEtosha yo yene oyo taya ka longa po iilonga mbyoka yo yoyene tashi pitile mokwiiyamba.
Okwa ti uuministeli otawu ka kala woo wi ipyakidhila unene mokukala ya longulula oondjila ndhoka hadhi longithwa kaataleli po yomEtosha.
“Shika otatu shi ningi mokukala twa sa oshimpwiyu kutya aatalelipo noshowo aayenda yetu yomEtosha oye li ye uvite uugumbo nuuntsa ngele taya talele po,” osho a hokolola ngaaka pethimbo a li ta popitha aanambelwa yomuuministeli moka lwotango nuumvo moshilandopangelo mEtitatu lyoshiwike shika.
Okwa ti kutya kakele kwaashoka sha popiwa pombanda uuministeli owu li komalwilo mokukala woo wa langeka opolohalama yilwe yedhina Friends of Parks Programme muule wethimbo efupi lela. Okwa ti ndjoka oyo opolohalama ndjoka tayi ka tsa aayambidhidhi, omahangano gwopaumwene noshowo aayambidhidhi yomudhingoloko ngoka omukumo nokuyambidhidha ehumokomeho lyuushana wiinamwenyo ya gamenwa moshilongo. Shifeta okwa ti kutya okwa pandula unene aanambelewa yomuuministeli owo tuu mboka unene tuu oshikondo shoka tashi ungaunga niinamwenyo kuushana molwiilonga ya longa ya simana noya opala nonande oya kala ya taalelwa komashongo ga yooloka mwa kwatelwa oshimaliwa shoka woo nasho sha li tashi shongola, noshowo oshikukuta shoka woo sha li sha adha iinamwenyo noku yi gwayitha ko kuushana.