Victoria Kaapanda

ONGWEDIVA-Aashingithi momoshituthi shomisuululwakalo shoshiputudhilo shopombanda International University of Management (IUM) inaya nyanyukilwa  onkalo ye li muyo.

Aashingithi oya li ya gandja omanyenyeto gawo kuKundana omutenya gwEtitatu, taya ti okuza mOmaandaha kaye na olusheno. Ohalu ningi ashike lwe ya ominute ntano , lo talu  gu ko natango nando uule woowili ntano. 

Ndeshy Akawa ngoka ha landitha  iikulya oshowo iikunwa okwa ti iilandithomwa ye oya pumbwa olusheno opo a landithe nawa ye a mone oshimalwa shoka a li a longitha okulanda iilongithomwa ye.
“Onda kanitha ookasitoma odhindji, oshoka inadhi hala okulya iikulya ya talala oshowo okunwa iikunwa iipyu.  Onda longitha N$ 30 000 okulanda iilandithomwa yandje, nelalakano ndi mone mo iimaliwa yi vule pwaambyoka nda longitha,” Akawa ta nyenyeta ngaaka.

Akawa ta ti nena Etitatu nale ihe sigo onena ina mona mo etata lyiimaliwa mbyoka a longitha oshoka ookasitoma ohadhi shuna oshoka iilandithomwa ye kayi li monkalo ombwaanawa medhina lyolusheno.
Ta gwedha po ta ti moshigongi shoka ya li ya ningilwa omanga inaya tameka omawuliko giipindi, okw ali ya kwashilipalekwa kaakomeho nokaalongedhi kutya nuumvo oya lundulula iinima ayihe oyi na okweenda nawa lela, ashike hasho.

Nelago Shiimi ngoka naye e na okatala kiikulya okwa ti ota longo nuudhigu oshoka okwa longitha ishewe iimaliwa ye kakwa li shi li pahalo lye, opo a ka konge okashina kolusheno opo a vule okutsikila nongeshefa ye. “Ongeshefa yandje itayi vulu oku ya komeho kaayi na olusheno, kape na ngu ta hala oku lya iikulya iitalala. Ngame ondi shi sho nda futa okatala onda kwatela kumwe nolusheno nomeya,” Shiimi ta ti ngaaka.
Ta nyenyeta kutya omvula tayi ya ita kutha we ombinga oshoka iimaliwa ye ashike ta tula momeya ye itaa likola mo sha. Uupyakadhi mboka wolusheno hapo wa tameke nuumvo, oya li ye na okukala ya lundulula.   
Gumwe gomaakuluntu mosikola yoIUM ngoka a ti edhina lye oAnna, okwa ti oya kambadhala okumona kutya epuko otali zi naana peni ihe inay shi mona. Ta ti otashi vulika oongodhi dhomalusheno tadhi longithwa muutala moka odho tadhi eta omawupyakadhi opo olusheno lu gwe ko.

Omawuliko giipindi ngoka haga ningwa omvula kehe oge li oshikando oshitiheyali nuumvo nohaga ningilwa okusimaneka nokukaleka po omuthigulukwalo, oga li ga tameke momasiku 23 notaga ka hula momasiku 28 gaSepetemba.