Opolisi mOshana ngashingeyi oya pitika opo aandholongo mboka yeli mondholongo moka ya vule oku talelwa po, oshipala noshipala.
Elandulathano ndika epe olya landula eigidho lyomupresidente gwoshilongo, lyoku kutha po omalandulathano
agehe goCovid-19.
Aanandholongo mondjendhililo yaShakati oya kala haya faalelwa iikulya kaapambele yawo Omandaaha, Etitatu oshowo Etitano, ihe kaya li ya pitikwa oku ya mona kiipala.
Omupopiliko gopolisi moshitopolwa shaShana Thomas Aiyambo okwa ti, nonando shoka sha pitikwa okuza Etitano lya za ko, omalandulathano oshowo oompango dhoCovid-19, opo ta dhi kala.
“Po kati komunandholongo oshowo omutalelipo openna okukala pena oshinanano, otaya itala ashike kiipala, ihe itaya nyengathana nenge ya hedhathane popepi,” ta fatulula ngaala.
Ta gwedhapo kutya aapolisi otayaka kwashilipaleka kutya oompamngo nomalanulathano adhihe odha gwanithwapo.
Otaku hokololwa kutya shoka okwa lisha tokolwa konima aanandholongo ya li ya nyenyeta kutya oya hala okukala taya taa kutya olye eya etela iikulya oshoka oyena uumbanda wo kutulilwa uuzigo miikulya.
Anuwa oya kala taya nyenyeta kutya, oya kala ethimbo nuule taya li ikulya nonando kayeshi ngoka eyi ya etela oshoka kapena ekwatathano.
Sophia Shitalangaho ngoka ena omupambele gee li ondholongo ota ti, aantu ayehe ye li mondholongo kayeshi aafithi yo haayehe yena oondjo, onkene oyenaokukala taya silwa oshimpwiyu ngaashi aantu ayehe.
“Ondina okamwameme kokamati keli mondjendhilio ihe otaka ti, oka ningi thimbo taka etelwa iikulya komuntu, ihe endhina ndyoka lyashangwa kelishi nando, shoka tashi tilitha,” ta nyenyeta ngaaka.
Ta ti, omolwa onkalo omuntu a taalela , ohaliashike nonando keoshi kulya iikulya oyazi peni.
“Etokolo ndyoka lya ningwa olyi li nawa. Aanandholongo paife otaya vulu okumona kutya iikulya taya li, oya etwa kulye,” ta popi ngaaka.
Nonando oyendji ka kala yena ontseyo kutya otapuya omalunduluko, yamwe okwa li ya shunithwako niikulya omanga yamwe kwa li ya galulwa ya ileko iikulya yawo ya loi ya gandja
nale.
Otaku hokololwa kutya, yamwe okwa li ya ningi aanelago esiku ndyoka nonando yimwe ya ka gandjwa momukomoko gwesiku.