Ongeleka yaLuteyi mOshitukulwa shaMusati nayo oya ningi oshihakanwa shuufuthi woongendjo ndhoka tadhi yakwa unene poongeleka dhaElcin. 

Aakwanegongalo yongeleka Oluteyi, Evangelical Lutheran Church in Namibia (Elcin) oya li ya haluthwa sho ongendjo ndjoka yi na omimvo 48 ya penduka kayi po. Omusitagongalo Wihelmiana Nepaka okwa lombwele oshifokundaneki shika kutya ke na ontseyo ethimbo ongendjo ndjoka yongushu N$ 120 000, ya yakwa po. 

“Otandi hokolola ashike shoka nda hokolelwa oshoka nangame kanda li po esiku ongendjo ya yakwa po, ashike onda ihula oku yi mona mOsoondaha ya zi ko,” ta hokolola ngaaka. Ta ti, aluhe Omaandaha goshiwike kehe, esiku lye lyokufudha po, ano iha longo. Ta hokolola ta ti, aaniilonga pamwe naye mboka kwa li ya yi Omaandaha kiilonga, kakwa li ya dhimbulula kutya ongendjo oya yakwa po, oshoka ombelewa yoshinyanga oyi li muuzilo wongeleka omanga ongendjo ya gama kuuninginino wongeleka. ‘’Moshanga shomutenya Omaandaha ngoka, omukwanegongalo gumwe okwa li a dhimbulula kutya ongendjo yongeleka kayi ko, nokutseyithila aanambelewa moshinyanga,’’ ta ti ngaaka. Nepaka ta ti, ongendjo ndjoka onkulu, oya kala po nale sho ongeleka ndjoka ya totwa po momumvo 1975. Ta ti, oshiningwanima shoka oshikumithi, osho lwotango tashi holoka megongalo lyawo. ‘’Kandi na ontseyo mpoka aafuthi haya fala oongendjo, ashike otandi indile ngoka a kwatwa kombepo yomutondi Saatana, opo a galule omadhiladhilo ge, e yi galule,’’ ta indile ngaaka. Omusita natango okwa indile Aakriste aakwawo ya galikane pamwe naye opo ya mone ongendjo yongeleka yawo. ‘’Ongendjo ohayi dhana onkandangala ya simana mongeleka, ohayi ithana wo aakwanegongalo kElongelokalunga, nena otatu ka longa ngiini?’’ ta pula ngaaka. Sha ikolela kiikundaneki ya yooloka oongendjo odha tameke oku indjipala okuyakwa okuza omumvo 2019, sho ongeleka yaShakati Elcin ya li ya yakwa ongendjo tayi tengenekwa yi na ongushu N$120 000. 

Natango iikundaneki okwa li ya lopota oongeleka yokOgongo oshowo Oshitayi dha li dha yakwa oongendjo ndhoongushu N$150 000, adhihe kumwe. Momumvo 2021, natango okwa lopotwa oongeleka mbali, Eengoma oshowo Olupaka moshitopolwa shaMusati, kwa li dha yakwa oongendjo omasiku ga landulathana, dhongushu N$130 000 kumwe. Otaku hokololwa kutya oongendjo odhi na ongushu oyindji, naafuthi oya mono oshilonga shadho. 

Otaku fekelwa oongendjo ndhoka hadhi ka landithwa kondje yiilongo, unene koSouth Africa. 

vkaapanda@nepc.com.na