Ontengenekothaneko yoshimaliwa shoku humitha komeho ondoolopa yaNgwediva lyomvo 2021/2022 olya gwedhelwa noopelelsenta 1.15 okuza N$144,874,594 mo2020/2021 ya ningi N$146,536,894. Mayola gwaNgwediva Tarah Shalyefu, Etiyali okwa popi ta ti, nuumvo elelo lyondoolopa olya tengeneka okuhumitha komeho Ongwediva, noku tunga oshowo okugwanithapo iilonga ayihe mbyoka ka kwali yapwa okulongwa omvo gwayi, omolwa omatompelo ga yooloka.
“Omumvo nguka otwa tengeneke okugandja omahala mondoolopa, okuhumitha komeho ondoolopa, okuninga omapekapeko, okutembudha omapya oshowo okulongulula oondjila opatate dhoteya noku dhi opaleka,” ta ti ngaaka. Ta ti, ooproyeka dhimwe dhoka dhali dha tamekwa okulogwa omumvo gwayi, ihe inadhi manwa okulongwa ngaashi, epandaanda lyongeleka, okutunga ehala lyonyata ko extention 15, okugwedhela ehala lyakadhima mulilo, eloli lyakadhima mulilo oshowo okutunga uupale womawudhano, otadhi ka manwa noshimaliwa shoomilliona N$29, 248,206 nuumvo.
Shalyefu ta po pi esiku ndyoka ta ti, oya tengeneka okulongitha oshimaliwa N$895,652 okuninga omapekapeko nokuthaneka omahala 230 and 231 extention 6, extension 5 extention17 oshowo okutopola evi kOmatando.
“Omvo gwayi elelo lyondoolopa okwali lya mono noku opaleka okapale komawudhano, hoka twa tengeka omilliona yimwe okukatungila uundjugo. Shika otashi kanyanyudha aanyasha momudhingoloko gwaNgwediva mboka yena ohokwe nomawudhano,” a popi ngaaka.
Ta gwedhapo ta ti, elelo lyondoolopa olya tengeneka oomilliona mbali okulanda oyiindjina onene, yo kaloli ka kadhima mulilo, opo ka vule okulonga iilonga yawo meendelelo, una pweya uupyakadhi womililo mondoolopa.
Mayola okwa popi tati, elelo lyondoolopa olyathaneka natango okulongitha oomilliona N$6,347,826 okumana okutunga ehala lyonyata koExtention 15.
“Oomilliona N$5,652,174 odha thanekwa okumana ehala lyonyata koSky. Omanga omilliona yimwe ya thanekwa okumana kulonga ondjila yo kweenda omeya komahala hoka geli muupyakadhi,,” ta ti ngaaka.
Mayola okwa ti, oomilliona N$8,500 000 odha thanekwa okutunga oshowo oku opaleka oopate momudhingoloko gwangwediva nuumvo, oshowo okumanitha dhoka dhali inaadhi pwa, omvo gwayi. “Elalakano lyetu okuhutha komeho nokutunga ondoolopa yetu, opo yi kale dhingi oshowo ehala ewanawa, “ a popi ngaaka.