New Era Newspaper

Header ads
Icon Collap
...
Home / Onkalo yomeya ya dhigupaleke elongo mOkalongo

Onkalo yomeya ya dhigupaleke elongo mOkalongo

2021-03-31  Victoria Kaapanda

Onkalo yomeya ya dhigupaleke elongo mOkalongo
Top of a Page

Aanasikola posikola Onkambadhala Primary  moshikandjohogololo Okalongo oye li moshiponga okutaaguluka omeya kehe esiku okuya nokuza kosikola sho opate ya teka po thiluthilu komeya.

Kansela gwoshikandjohogololo Okalongo moshitopolwa shaMusati Laurentius Iipinge okwa ti, natango omagumbo ge li gatatu momukunda Onembaba oshowo Olupito oge li kohi yomeya. “Omeya ngoka oga li ga yi momagumbo ngoka ge li popepi nopate, oshoka kage na mpoka taga piti. Omeya ohaga shuna konima oshoka kape na uuntopa womeya ga pite,” a fatulula ngaaka. Ta ti, ke wete omeya gomvula ga ya sigo omomagumbo, ihe omeya ngoka oonga ga galuka ko kopate.

Iipinge ta ti, uunona wosikola owu li moshiponga okutaaguluka omeya okuya kosikola oshoka kawu na we mpa tawu vulu okupita opo wu ye kosikola.

“Uunona wumwe ohawu thindikilwa nokupitithwa kaakuluntu yawo, ihe wumwe ohawu piti kuwo wene. 

Osikola ndjoka inayi patwa natango, po kape na ethaneko kutya otayi ka pata komasiku gokomeho,” ta ti ngaaka.

Ta ti, osikola ndjoka oyi na ondondo 0-7 nuunona owundji wu li posikola mpoka, uushona nowa pumbwa okupitithwa omeya, oshoka omeya oshinima sha nika oshiponga.

Kansela okwa ti, aalongi yopate oya tameka nale okulonga, oshowo okumeta mpoka ta pu ka tulwa oontopa okukeelela omawupyakadhi ga tya ngaaka monakuyiwa,” a popi ngaaka.

Ta ti, okwa inekela kutya opate otayi longwa yi pwe methimbo efupi, opo aalongwa ya tsikile okuya kosikola ya manguluka.  “Omvula oya loka nawa moshitopolwa shetu, nonando omawupyakadhi ngoka ga holoka,” ta popi ngaaka.


2021-03-31  Victoria Kaapanda

Share on social media
Bottom of a page