New Era Newspaper

New Era Epaper
Icon Collap
...
Home / Onooli oi li mokati kaShiyenga oshivike eshi

Onooli oi li mokati kaShiyenga oshivike eshi

2023-11-29  Festus Hamalwa

Onooli oi li mokati kaShiyenga oshivike eshi

Omunambelewapitifi kehangano longhalo yomhepo Odile Kgobetsi okwa ti oshivike eshi okwa teelelwa odula ihapu i kale ya loka monooli. 

Okwa ti odula otai ka kala i na omingungumo noushelu vahapu. 

Okwa weda po ta ti okwa teelelwa yoo vali omata odula mahapu koitukulwa ngaashi Erongo, Khomas nOtjozondjupa. 

Okwa didilikwa ovanhu vamwe moshitukulwa shaHangwena va tameka nale okulima omanga vamwe okulya ombidi konima eshi va mona omuloka muwa. Oimuna nayo oya tameka okupaluka molwaashi okaxuluxulu oka mena paife. 

Kgobetsi okwa kumaida oshiwana opo shi kale sha ngungumana pefimbo lodula tai loko opo kukelelwe ovanhu vaha fye koushelu. Okwa ti oushelu kave hole ovanhu tava endaenda, ovanhu ve li koshi yomiti mumwe noimuma ile tava longifa eengodi dopeke molwaashi osha nyika oshiponga. Okwa weda po ta ti ohashi eta noupu opo okashelu ka kwate ovanhu ngeenge ve li mumwe noimuna koshi yomiti. Onghee okwa kumaida oshiwana opo shi xulife po okushingila oikombo koshi yomiti ngeenge odula tai loko. 

“Ovanhu noikombo ova ninga oihakanwa yokukwatwa koushelu ngeenge taku lokwa,” ta ti. 

Kgobetsi okwa ti unene tuu pefimbo loufita ovanhu ngeenge ve wete odula i li popepi nokuloka nava tameke okushingila oimuna popepi neumbo opo ngeenge odula ya tameka okuluka, yoo oimuna tai twalwa koshuunda. 

Okwa kumaida yoo vali ovakulunhu opo va kale tava popi nounona vavo ngeenge va ka lifa opo va twale oimuna koshuunda ngeenge ta ku lokwa ndele haku ya haama odula koshi yomiti mumwe noimuna. “Ovanhu nava topolafane ouyelele momikunda davo kombinga yokashelu opo va kale tave liufa komilandu ngeenge taku lokwa,” Kgobetsi ta ti. 

fhamalwa@nepc.com.na 


2023-11-29  Festus Hamalwa

Share on social media