Omanga oshilongo ashihe kwali tashi ndhimbulukwa nokutyapula evalo lyomukulili oshowo omumvo omupe, aavali 143 oyali ya yambekwa noohanona momasiku moka.
Uuministeli wuuhaku owa lopota oohanona ndhoka dha valwa miitopolwa ihetatu yoshilongo.
Miitopolwa ayihe mbyoka ya yambekwa naantu aape, oshitopolwa shaKhomas osha ndhindhilikwa sha mono oohanona odhindji, dhili 36 tashi landulwa kOshikoto moka mwa valwa oohanona 30. Omukuluntu goshikando shuuhaku moshitopolwa shaHangwena John Hango okwa ti, oohanona dhili omugoyi odha valelwa moshipangelo shEngela, noohanona dhili 14 odha moniwa moshipalo shEenhana omanga ohanona yimwe omoshipangelo shaKongo.
“Oshitopolwa ashihe shaHangwena osha yambekwa noohanona dhili 24 adhihe kumwe,” ta ti ngaaka.
Sha ikolela kuuyelele wa gandjwa koshikundaneki sho Namibian Sun, omukuluntu guuhaku moshitopolwa shaMusati Alfons Amoomo okwa ti, oohanona dhili 19 odhali dha ndhindhilikwa esiku lyomvo omupe omanga ndhili 23 dha ndhindhilikwa esiku lyOkili.
“Oohanona ndhili 10 odha moniwa moshipangelo Outapi noohanona ndhili ne odha moniwa mOshikuku, ndhili ine natango odha moniwa moshipangelo shaTsandi omanga ohanona yimwe ya moniwa moshipangelo shOkahao,” ta ti ngaaka. Amoomo anuwa esiku ndyoka okwali aningi omashendjo kutya omolwa ashike aantu taya landula oompango dho kukeelela omukithi tagu ndhana onkandangala moshilongo, ngeno oya yambekwa nohanona dhi vule 50 ngaashi shito, ta imemeha.
Oshitopolwa shaKavango gokuuzilo osha ndhindhilikwa noohanona ndhili 22, Otjozondjupa oohanona heyali omanga Kavango gokuuninginino andhilikwa noohanona hamano.
//Kharas oshowo Kunene oya ndhindhilikwa noohanona hetatu. Omupangi omukulu Ndaahafa Shilombwela atseyika nawa nedhina “Sesetera ndaahafa” gomOshakati, ngoka aningi ngaashi ngeyi omimvo 12 moshipundi she vululuko okwafatulula ta ti, aanona ya valwa momasiku ngoka gaali oya yambekwa.
“Omasiku ngoka ogasimana no gayambekwa. Pethimbo ndali omupangi, okwali hatu mono ashike uunona momasiku ngoka wuli ashike, uyali nenge utatu, ihe okwali hatu kala tweu hokwa nokuwutumbaleka,” ta hokolola ngaaka.
Ta ti, nena omwaalu oguuka pombanda omvo kehe, oshi shi okupandalwa. – vkaapanda@nepc.com.na