New Era Newspaper

New Era Epaper
Icon Collap
...
Home / Oohanona onkene tadhi tsikile okusa omeya

Oohanona onkene tadhi tsikile okusa omeya

2023-01-31  Victoria Kaapanda

Oohanona onkene tadhi tsikile okusa omeya

Omaso gaanona taya si komeya onkene taga indjipala unene miitopolwa yokonooli pethimbo ndika lyomvula.

Iiningwanima mbika ohayi holoka olundji pethimbo lyomvula omolwaakuluntu itaaya sile aanona oshimpwiyu ngaashi shi na okukala.

Mehuliloshiwike opolisi moshitopolwa shaShana oya lopota okanona komimvo ndatu ka si omeya sho kwa li ka landula yina monima sigo ka ka gwila moshihenene shi na omeya.

Omugandji gomauyelele gwopolosi moshitopolwa shaShana Thomas Aiyambo okwa ti oshiningwanima shoka osha holoka momukunda Oshitowa.

Otaku hokololwa kutya okanona hoka oka li ka thigwa nayakwawo megumbo, yomimvo ndatu oshowo hamano mboka kwa li ya kotha pethimbo ndyoka.

Okanona hoka anuwa oka i ka landula yina sho a zi mo megumbo, ihe ine ka mona.

Sho yakwawo anuwa ya penduka oya kala nokukonga mukwawo, noku ka tseyithila yina.

Aiyambo okwa ti sho anuwa a landula mpoka okanona hoka keenda, oompadhi dhako odhe mu fala sigo omoshihenene shomeya, nomudhimba gu li kombanda yomeya. 

Nakusa okwa tseyika nedhina Micheal Michael Iipinge.

Natango mehuliloshiwike omwa lopotwa okanona komimvo ndatu ka si omeya.

Opolisi moshitopolwa shaMusati oya lopota kutya oshiningwanima shoka osha holoka momukunda Ontsima momudhingoloko Oshikuku.

Otaku hokololwa kutya okanona hoka oka li ka thigwa megumbo kuyina naanona aakwawo oshowo omukuluntu gumwe. 

Ngoka omukuluntu kuyakwawo anuwa okwa li a kotha nokanona hoka oka li ke ende sigo ka gwile mokanala komeya moka ka sile.

Moshiningwanima shimwe sha faathana sha holoka natango oshiwike sha zi ko, omudhimba gokanona komimvo ndatu ogwa li gwa hololwa kuunona uukwawo ashike esiku lya landula, sho wa lala nago. Sha ikwatelela komukuluntu gwopolosi moshitopolwa shaMusati Ismael Basson, oshinima shoka osha holoka momukunda Oluhalu momidhingoloko gwaTsandi.

Otaku hokololwa kutya uunona mboka wu na omimvo ntano oshowo hetatu owa li pamwe nokanona hoka ka si omeya, omanga aakuluntu ya yi koondingosho. Sho anuwa okanona hoka komimvo ndatu ka gwile momuthima okwa li ka kuthwa mo kuyakwawo mboka yaali. Basson okwa ti okwa li ya hilile omudhimba mondunda yokulala, e taya siikile omudhimba nelapi. Sho anuwa aakuluntu ya galuka koondingosho konguloshi oya thikile ashike taya kalala, naanona mboka okwali ya kalala pamwe nomudhimba ngoka.

Ta ti ongula sho ya penduka opo kwali ya holola omudhimba gokanona hoka.

Omugandji gomauyelele gwopolosi moshitopolwa shaMusati Anna Kunga okwa kumagidha aakuluntu, ya ya sile aanona oshimpwiyu konima a dhimbulula kutya omaso gwuunona wu na oomvula oonshona otaga yi pombanda.

Ta ti, aakuluntu naya sile aanona oshimpwiyu.

“Omeya oshinima sha nika oshiponga, unene kaanona. Ndika ethimbo lyomvula, ihe omaso guunona tawu si komeya otaga yi pombanda,” Kunga a popi ngaaka.

Okwa gwedha po ta ti aakuluntu naya kumagidhe aanona kaaya dhane yo ya kale kokule nomithima, omatale oshowo oondungu dhomeya.

vkaapanda@nepc.com.na


2023-01-31  Victoria Kaapanda

Share on social media