Opolisi moshitopolwa shaMusati oya haluthwa koshiningwanima moka ohanana opo ya valwa ya adhika ya kangalala kombanda yomeya ya sa.
Omukwatakanithi nomukonaakoni gwiimbuluma moshitopolwa shoka Moses Simaho okwa koleke onkundana ndjoka ta ti kutya oshiningwanima shoka osha itsuwa  mOsoondaha yehulilo shiwike lya zi ko potundi  16h00 pomukunda gwedhina  Omukoko moshikandjohogololo Outapi .
Okwa hokolola kutya okahanona hoka ka ke shiwike oka li ka   monika kaayendinandjila  mendambo lyomeya na  otaku fekelwa ka dhipagwa omanga  inaka  umbilwa mo mendambo ndyoka.

 Okwa ti aapambele yohanana ndjoka kaye shiwike nohanana woo inayi dhimbululwa, onkene aapolisi mboka otaya indile kehe ngoka e shi omuntu e na okanona nenge a li e na epunda ihe kapu na okanona a kale a lopotwa kopolisi meendelelo.
Omudhimba ngoka ogwa falwa kokila yopolisi kOkahao, nomakonaakono gopolisi otaga tsikile.
Oshiningwanima oshikwawo sha yooloka ooshoka olutu lwa ninga nayi lwohanana opo ya valwa lwi itsuwa komunkulo gwondombe yomeya moshitopolwa shaShikoto.

Okwa hokololwa kutya olutu ndoka nalwo woo olwa li lwa monika mOsoondaha yeshuliloshiwike lya zi ko kaanona aashona mboka ya li taya dhana popepi nondombe ndjoka, ashike otaku fekelwa kutya omunona ngoka okwa umbilwa po.
Moshiningwanima sha yooloka, moshitopolwa shaHangwena, okanona oka si sho ka lika keyoka. Otaku hokololwa okanona haka nayakwao yalwe ya li ya ka konga omaka komuti. Omusinda gweyoka ogwa li gwa monika ashike eyoka ndyoka inali monika kolutu.
Nakusa ngoka e shiwike nedhina Foibe Shimweefeleni okwa si omanga e li mondjila ta falwa koshipangelo, naakwanezimo lye oya tseyithilwa nale eso lye.