ONGWEDIVA- Aafuthi nayo ngashiingeyi otaya endele pamwe nethimbo, noye li taya longitha omikalo dhi ili nodhi ili opo yam one okulya. Moshiningwanima oshitalala, aalumentu yaali oya li ya ponekele ehala lyomayinyanyudho oshowo lyokuvulukwa tali ithanwa Ongwediva Junior Hotel, taya kengelele
aaniilonga kutya yo aapolisi yaNamibia mboka haya konaakona monanguyi.

Omugandjimulombo gwopolisi moshitopolwa  shaShana Inspector Thomas Aiyambo ongula yEtine okwa li a kunkilile aakwashigwana kutya aapolisi yaNamibia oye na omandhindhiliko ngoka ga tseyika nawa mokati koshigwana . Ta hokolola ta ti oshiningwanima shono osha li sha holoka mEtitatu lwopotundi
18h00 mOngwediva. Ta ti aalumentu mboka sho ya li ya gandja ehokololo kugumwe gwomaaniilonga ngoka ha gandja omayakulo gotango okwa li a mono kutya aalumentu mboka ookalyamupombo. Nonando ya li ya zala oshinambelewa lela notaya monika yafa aanashilongo shili, omuniilonga ngoka okwa li
a dhimbulula kutya ookalyamupombo oshoka kaye na nando uuthemba tawu ulike kutya aapolisi. “Aapolisi yaNamibia oye na omandhindhiliko ngoka ge shiwike koshigwana, oye na iikutu yiilonga, nongele aakonakoni ngaashi aafuthi mboka ya li ya hala okukengelela aanilonga mboka, aapolisi yaakonakoni oye na okukala ya humbata okamutse kiilonga hoka taka ulike kutya omupolisi gwaNamibia shili ethimbo kehe,” Aiyambo ta ti ngaaka.

Otaku hokololwa kutya omuniilonga ngoka sho a li a dhimbulula kutya kaye shi aapolisi yoshili okwa li a ningi onkambadhala yekwatho lyomeendelelo, ashike ookalyamupombo oya li ye shi dhimbulula kutya otaya lopotwa ee taya thigi po ehala meendelelo.

Aalumentu mboka oya li taya hingi ohauto ontokele yoToyota Dakar yonomola yaWindhoek, ashike onomola yohauto inayi monika nawa oshoka ohauto oya li ya thikamithwa momilema. Aiyambo okwa li a kumagidha
oshigwana ta ti ngele ya mono omayinyengo taga limbilike naya kale ya dhengela opolisi koonomola
dhosheendelelala tadhi landula: 081 3630 666 Oshakati, 081 3873 555 Ongwediva, oshowo 081 4029 009 Ondangwa.