Omupopiliko wopolifi moshitukulwa Erongo Inspector Ileni Shapumba okwa ti ookalyamupombo vanhe ova ponokela mofaalama mOmaruru ndele tava dipaa mo oikombo itano, eedi 24 neengobe nhatu pokati kOsoondaxa nOmaandaxa lopotundi 20h00.
Eedi da dipawa odi li pongushu yoshimaliwa N$28 800, oikombo N$6 000 omanga eengobe odili pongushu N$28 500. Shapumba okwa hokolola ta ti ovafekelwa ova kengelela ovanhu va hangika mofaalama tava ti kutya otava kwafelwa omeva okunwa ashike konima yefimbo eshi va pewa omeva ova ponokela ovanhu noku va manga needalate komaako, komaulu nokomesho.
Ookalyamupombo ova ya koshuunda shoimuna ndele tava tameke okudipaa oimuna manga oovene wofaalama va mangwa.
“Ovafekelwa ova dengela ookaume kavo opo ve uye va londeke po oimuna aishe ya dipawa nokufaduka po,” Shapumba ta ti.
Okwa ti ovafekelwa ova kufa mo yoo vali omadini 25 omashini, okashina kolusheno ha ka longo nomahooli deengodi mbali dopeke doovene vofaalama nosho tuu oinima ikwao ya yooloka ya hangika mofaalama.
Ovafekelwa ofiya yoo vali va dipaa eedi hetatu moshuunda da tetwa ominino.
Shapumba okwa ti Etivali loshivike eshi opolifi oya kwata po ovafekelwa vatatu modoolopa yaSwakopmund eshi va hangika ve na okashina ko kolusheno, oikombo ivali ya fya, omutwe woshikombo umwe.
Okwa ti ovafekelwa vahamano ove shivike nawa kutya ova okudja kOtjimbingwe nokomudingonoko Omatjette ashike paife ovakalimo womodoloopa yaSwakop.
Onghee ova faduka po ashike opolifi oyeli pyakidila nokuninga omakonakono.
Ota kufekelwa kutya oimuna ya dipawa aishe oya etwa modoolopa yaSwakop opo i landifwe kovafekelwa.
Onakuninga oshihakanwa ova twalwa kopangelo Omajete opo ka mone epango lopaunamiti. Opolifi otai indile omoshiwa kwau e na ouyelele kombinga yoimuna ile ovanhu tava ka monika tava landifa ombelela opo oshiwana shi kale sha shivifila omupedu Commissioner Erastus Iikuyu 0812464757 ile oshiwana shi lopotele opolifi keshe ili popepi.