New Era Newspaper

New Era Epaper
Icon Collap
...
Home / Ookalyamupombo ya pimbila oshilongo ashihe

Ookalyamupombo ya pimbila oshilongo ashihe

2022-08-11  Victoria Kaapanda

Ookalyamupombo ya pimbila oshilongo ashihe

Oshigwana pamwe nopolisi moshilongo oya taalela omaupyakadhi giimbuluma, mbyoka tayi ende tayi indjipala, noya pimbila ethimbo ndika lyu uka pomatango omanene.

Iimbuluma otayi lopotwa tayi indjipala moshilongo ashihe.

Opolisi oya lopota omulumentu gomimvo dho pokati a si sho a tsuwa noombele kuwalye, e ta yugwa iinima ye.

Otaku hokololwa oshiningwanima shoka sha holoka moshitopolwa shaHangwena.

Opolisi oya hokolola kutya omulumentu ngoka okwa li a ka huluthila koshipangelo.

Tayi ti, okwa li a yugwa oongaku dhe oshowo ongodhi ye yopeke.

Opolisi otayi indile moshigwana shi lopote ngele ope na ngoka e shi ngoka a tsu nokudhipaga omulumentu ngoka.

Aafuthi oya pimbila, onkene itatu hulitha okulondodha oshigwana shi kale uupathi.

Opolisi oya kumagidha wo natango oshigwana shi kale sha kotekela uutakisi mopate. “Aafuthi oyi iningi aahingi yuutakisi, ya ningila okuyuga afaalelwa, yo taya tula ko oonomola dhoohauto kaadhi shi dhoshili,” tayi kumagidha ngaaka.

Omukiintu gumwe oshiwike sha zi ko okwa li a yugwa oongodhi ye oshowo N$10, ndjoka oyo ayike ya li yi li mondjato ye.

Otaku hokololwa omukiintu ngoka a li a lefa okatakisi, a uka ngeno koGame.

Sho anuwa ya thiki mokati, pomagumbo gopEhenye, otakisi okwa li ya zi ko kopate.

“Omuhingi ngoka kwa li a kutha omwele, e yi ulika omufaalelwa omanga ta pula oshimaliwa nongodhi,” nakuyugwa ta hokolola.

Ta ti okwa li eyi gandja, eta thigwa mpoka, ihe kakwa li a vula okukutha ko onomola yohauto.

Omupopiliko gwopolisi moshitopolwa shaShana Thomas Aiyambo okwa ti, iimbuluma oya indjipala, aafuthi otaya longitha ompito kehe okuyuga aakwashigwana iinima yawo, iihauto oshowo okuteya omagumbo.

Aiyambo ta ti, ndika olyo ethimbo ookalyamupombo taya longo ya itula mo onkene oshigwana inashi pumbwa okukala sha kotha tashi mbonyoka.

“Onda kala nokupopya iiningwanima tayi longwa kaafuthi miikundaneki ya yooloka oshowo okukumagidha oshigwana nkene shi na okwiihumbata, ihe natango otatu lopotelwa iiningwanima yoludhi ndoka,” Aiyambo ta ti ngaaka. Natango okwa lopotwa omukiintu gumwe kwa li a ponekelwa mondingosho kaafuthi momukunda Onaanda. Otaku hokololwa kutya iimaliwa mbyoka inayi shiwika natango kutya ingapi ya yiwa nayo ontuku kaafuthi.

Oshiwike shika omahala gomanwino ge li gane mOshakati, oga ponokelwa kookalyamupombo, no ya li ya yi ontuku niimaliwa oshowo omashina gokundhana.

“Ota tu indile moshigwana kehe ngoka ta mono aantu taya landitha omashina ya lopotele opolisi yi li pope pi naye,” ta yi indile ngaaka.

Omahala gena iinima yongushu ohaga kala ga tegwa kookalyamupombo, onkene ooyene yomahala otaya indilwa ya kale yena aakeleli yomatungo, okuyanda iningwanima yolundhi ndoka yi holoke.

Pehala pena omuntu ope vule mpoka pe li owala, ookaloyamupombo otaya tila okuya po.

vkaapanda@epc.com.na


2022-08-11  Victoria Kaapanda

Share on social media