Victoria Kaapanda
ONGWEDIVA-Aaholi naahili yepangwe ye vule 30 mOshana oya ningi omunyanyo momapandaanda mOshakati Etitano lya zi ko, ya hala Epangelo lyi pitike Epangwe okuhilwa moNamibia.
Ekanka lyombili ndyoka lya li lya longwekidhwa kaalumentu ya zala omizalo dhi li momalwaala gorasta mwa kwatelwa omukiintu gumwe, olya li lya nyonyolwa okuza poombelewa dhoSocial Security sigo opoombelewa dhaNgoloneya gwaShana mOshakati.
Momushangwa gwawo ngoka gwa li gwa taambwa ko komunambelewa mombelewa yaNgoloneya Moses Matatias peha lyaNgoloneya oya li ya popi kutya okatendo hoka taka longithwa kepangelo okukeelela epangwe kali longithwe moshilongo oka kulupa, onkene naka hulithwe po.
Gumwe gwomaalongithi yepangwe a za kehangano tali ithanwa The National Institute on Drug Abuse , okwa li a fatulula epangwe onge oshigwanga kasha na uupyakadhi washa , ta ti ihali hilwa ashike ngaashi oshigwana tashi dhilaadhila, ihe ohali panga wo omikithi dha yooloka.
Ta ti epangwe ohali vulu okukeelela ikwandjuhwa okukwatwa komikithi, ohali vulu oku tulwa piilalo nosho tuu.
Ta gwedha po ta ti oshigwana osha pukithwa kutya epangwe ohali piyaganeke omadhilaadhilo gomuntu ihe hasho, kali na nando uupyakadhi washa.
“Uupyakadhi wepangwe momuntu ohawu ya mo ashike ngele gumwe e li hila a pitilila, ihe kandi wete uupyakadhi oshoka kehe shimwe oshi na oshilanduli, omalovu nago oge na uupyakadhi ihe ongele ga nuwa ga pitilila, ashike inaga keelelwa mo moshilongo,” Omuhili gwepangwe ta fatulula.
Ongundu ndjoka oya li wo ya fatulula kutya oya loloka oku mangwa kopolisi medhina lyoshigwanga hashi mene nosha shitwa kuKalunga. Taya ti oyendji oye li moondholongo oshoka oya adhika nomapangwe momagumbo gawo ihe inaya ninga sha sha puka, epangelo nali tale po nokulundulula okatendo kawo hoka.
Oya li wo ya gandja omanyenyeto gawo kutya okuza omumvo gwa yi epangelo olya li lya lundulula oompango dhoshilongo odhindji, ihe kombinga yepangwe olya li lye shi ende pooha, taya pula kutyaomolwashike uuthemba wawo inaawu yalulwa.
Omugandjimulombo oshowo omupopiliko gopolisi moshitopolwa shaShana Thomas Aiyambo okwa ti edhilaadhilo lyokupitika epangwe moNamibia olya puka notali pukitha oshigwana.
‘Kehe ethimbo otatu lopotelwa iimbuluma ya longwa kaantu ye li kohi yomapangwe, uunona wosikola otawu thigi po oosikola tawu ka hila nokulanditha omapangwe, oshinima shoka osha puka noonkondo,” Aiyambo ta ti ngaaka.
Ta popi ta ti epangwe oshinima sha puka na ite shi popile nando aantu sho taya dhipagwa moshilongo omedhina aantu ya hila iingangamithi, nongele ta ka longa iilonga ye iiwanayi a kale keena ko nasha, naasho ta ka dhimbula kutya shoka a ningi osha puka osha pwa nale no kape na we shimwe tashi ningwa po.
Matatias okwa ti omushangwa gwawo ogwa taambwa ko nawa note ke gu thikitha kuuministeli wu li mondjila, okwa li wo a kumagidha ya tsikile okuyambula po nokusimaneka oompango dhekotampango lyoshilongo.