Okahao - Omalongekidho goshituthi shomagongo shoka tashi unganekwa kAanekuni yamulilo, oshiulongo sha temena iikwawo omulilo oge li metifa nokonyala ayihe oya na kandjegele sho ku na owala iiwike yontumba opo ongongola yi ka ngongole mpeyaka pombala yoshitunda pUukwandongo.

Elenga ekuluntu lyoshitunda shaNgandjera Tatekulu Sioni Sheehama okwa li a kuthile ko Kundana kunkene omalongekidho taga humu komeho, komeho goshituthi oshinene shomagongo.

“Omalongekidho otaga humu nawa komeho, okangundulongekidhi otaka longo omutenya nuusiku okutula ayihe pomahala, oshigwana otashi gandja iikwathithi lela notu li nale twa gongela po oolitela dhomagongo dhi li 3000.
Okwa ti kakele koolitela dhomagongo oye li wo ya pewa iimuna mbyoka tayi ka tselwa siku ndyoka oshoka omagongo oge hole taga endele pamwe nontalala.

Otwa li wo twa ningi iikonga yoku gongela oshimaliwa moka ehuliloshiwike twazi twa li twa ningi oshituthi oshitiyali shahugunina, mOkahao shoka sha li sha nana omwaalu gwaantu okuza koombinga ne dhaNamibia.
Sioni ta tsikile ko ta ti oshituthi shika osha tegelelwa shi ka nane aantu oyendji okuza koombinga noombinga onkene oye li ya tula po omutengenekofaneko gwoshimaliwa ngoka tagu matuka pokati koN$ 500 000- N$70000.

Kepulo kutya esimano lyokutyapula oshituthi shomagongo oli li peni, tatekulu Sioni okwa li a yamukula kutya omagongo ogo oshikunwa shopashigwana nosha tulwa koshiyalo koshitayihangano dhiigwana hangano shoUNESCO shoka tashi igidha iigwana opo yi tyapule iikwankulunkedhi.

“Omagongo ohaga etwa po okuza miiyimati yoongongo noha ga kolwa koomeme taya longitha iikolo okuthina mo omeya ngoka haga longekidhwa nawa, nangele oga pi ohaga ithanwa nduno omagongo ngoka ge shiwike nedhina ongongola. 
Omagongo ngele oga holoka megumbo nena omusamne oha ithana nduno aasamane aakwawo opo ya nwe mothinge, gwo ohaga litha nduno aanegumbo oshoka mandala siku ndyoka iha kala inaya koshigunda akuthe ko newewe yo ya lye montala,”Sioni ta ti.

Okwa ti omagongo ihaga nuwa kaanona, oshoka aanona ohaya nu oshinwa, shoka hashi zi moongongo na kasha na iikolitha.

Omihoko adhihe moNamibia naayenda ya za miilongo yilwe muuyuni odha tegelela dhi ke tu wayimine siku ndyoka onkene natango omweelo ogwa eguluka kwaamboka ye na iikwathithi naashoka ye na po mbika otayi vulu okuthikithwa pombala yoshilongo pUukwandongo.

“Oshituthi shomagongo otashi ka kala ko okuza momasiku 26-27 gaApilili pombala yoshitunda shAngandjera pUukwandongo, moka mesiku 26 tamu ka kala ohungi tayi kala ko kongulohi omanga oshituthi shomagomgo otashi kala momasiku 27,” Sioni ta ti.