Ovakainhu va teelela okumona ounona koshipangelo shaNandjokwe otava ti ove li monghalo ya mbadapala shaashi hava nangala va shaama nokila yomidimba.
Ovakainhu ava ove li po meengudu mbali –pe na ovo hava nangala mewalanda, hava futu N$2 mefiku, navamwe hava nangala pondje, meemwandi di li poshivelo shewalanda shaashi vati mewalanda ova hanga mu yadi, inava mona mo onhele.
Pefimbo Kundana a talela po onhele oyo, pondje opwa li pe na oomeme ve dulife 30 ve li momateelelo nova hokolola tava ti ohava nangala koshi yomiti.
Ovakainhu ova ti ove uya moshipangelo shaNandjokwe va teelela okupulumuna ashike ova hanga mewalanda omo hamu kala oomeme ve lihumbata mu yadi nale.
Onghee ova fininikwa konghalo opo va nangale pondje shaashi itava dulu vali okushuna komaumbo shaashi okokule, vali omateelelo avo oku li popepi nokudalwa.
Ewalanda onhele oyo hai kala ovakainhu ve li momatelelo have uya okuteelela ngeenge ve li popepi nokupulumuna noshoyo okukala ve li popepi noshipangelo.
Ewalanda oha li kwafele ovakainhu ve li momateelelo taa hale okudalwa opo vaha ende vali eendjila diledile unene tuu ava hava di kokule noshipangelo. Ova ti kutya kave udite ombili eshi hava nangala va shaama nokila, unene tuu ovo hava nangala pondje. Tava ti alushe ngeenge va kofa ohava piyaanekwa komalinyengo ovanailonga kokila ngeenge tava twala omidimba kokila. Ruusa Heimo a dile komukunda Onamulunga okwa lombwela Kundana ta ti paife okwa ninga oivike itatu ta nangala pedu koshi yomuti omanga a teelela a pulumune.
“Ohatu kala twa tila okulika komayoka nokeendje shaashi omafimbo amwe ohaku kala ku na omhepo. Ihatu kala vali twa manguluka shaashi ohatu kala atu piyaanekwa koombishi hava kala tava li mo oikulya yetu oufiku,” Heimo ta hokolola. Okwa hokolola ta ti efimbo lomutenya ova lulilwa koikombo hai kala tai nu mo oshikundu shavo ngeenge va kofa po shaashi kave na onhele yokutuvikila oikulya yavo.
“Ngeenge odula oya tameka okuloka ka tuna kutya ohatu uka peni noinima yetu oina ashike okulokwa onghee ohatu mono oixuna eshi tuli ponhele apa,” ta hokolola.
Elizabeth Andreas naye a ninga oshivike shimwe ta nangala pedu koshi yomuti okwa hokolola ta ti osha nyika oshiponga komukainhu e na eteelelo lakula ndele oha nangala pedu pa yalwa ashike oipakete.
“Ohatu telekele momutenya, ohatu ka konga oikuni komakule shaashi meni loshipangelo kamu na oikuni,” ta hokolola.
Ovakainhu ava hava nangala meni lewalanda ova weda po tava ti ohava nangala keembete da tekauka omanga vamwe ohava nangala pedu meni lewalanda.
“Ohatu longifa oundjuwo va tekauka, ngeenge owa i kokandjuwo oto hange ko omukweyo wovanhu ve uya okulongifa okandjuwo shaashi kape na oundjuwo va wana,” umwe womukainhu ta hokolola.
Onghee ova pula epangelo opo li kale la tunga onhele yewalanda ya kula ei tai dulu okukala ovanhu vahapu noshoyo okukala va tungilwa omatala omudile komafiya okutelekela.
Lopokati opo, ovakulupe ve uya okukalela ovanaudu vavo ve li moshipangelo shaNandjokwe navo ova nyenyeta tava ti ohava nangala koshi yomiti pedu nokutelekela pomutenya. Eshi a kwatafana naKundana nomukulunhuwiliki wouhaku moshitukulwa shaShikoto Joshua Nghipangelwa okwa ti ombelewa yaye oya didilika omashongo aa taalelwa kewalanda oku haku kala oomeme ngeenge ve uya okutelela okupulumuna.
“Otwa tula nale moilonga opo tu kale twa longulula ewalanda shaashi ola kulupa noshoyo okukala twa ninga etala lomudile lokutelekela,” Nghipangelwa ta ti.