Nonando oshitopolwa shaHangwena sha kala sha taalela omaupyakadhi oku shi humitha komeho, ngaashi oompito dhiilonga dha pumba, omahepeko gwomomagumbo, uuyogoki oshowo omeya ga yela, osha kambadhala okukandula po gamwe gomomaupyakadhi.

Ndhoka odha li dha popiwa kungoloneya gwoshitopolwa shaHangwena Walde Natangwe Ndevashiya, momushangwa gwe gwokomumvo sho a li a totha mo nkene oshitopolwa tashi humu komeho oshowo omaupyakadhi sha taalela.

“Oyindji oya shunithwa monima sho omukithi gwoCovid-19 gwa ponokele oshilongo. Ihe natango  oshitopolwa shetu osha li sha kambadhala okukandula po omawupyakadhi gamwe nomayambidhidho shali sha pewa okuza kepangelo oshowo komahangano galwe ga yooloka,” ta popi ngaaka.

“Aakwashigwana ye li 769, 130 mOhangwena oya yambidhidhwa momikalo dha yooloka, okulwitha nokukeelela omukithi ngoka gu taandele kongushu yoshimaliwa oomillion  55.8,” ayelitha ngaaka.

Ngoloneya okwa ti, aapangi ye li 124 oya kutwa muumnisteli wuundjolowele moshitopolwa shaHangwena omolwomukithi ngoka, opo ya gandje omayambidhidho ga pumbiwa.

Shoka osha li natango sha kwathele okukutha aanyasha momapandaanda okumona iilonga.

“Ehala lyokuminikililwa poongaamba dhaShikango naSanta Clara olya opalekwa, nehala lyaantu ya ningi iihakanwa yomukithi gwoCovid-19 olya tungwa poongamba ndhoka,” ta ti ngaaka.

Ndevashiya natango okwa popi kutya, iipangelo itatu mOhangwena oya tungilwa omahala gaantu taya ikalekelwa, uuna ya monika omukithi ngoka.

Ta ti, kOkongo nEngela okwa tungwa ehala lyoombete hetatu omanga Eenhana kwa tungwa ehala lyoombete 12.

“Oshitopolwa shetu natango osha mono iilongitho yokulwitha omukithi ngoka ya yooloka, mwa kwatelwa omashina giifudhitho omape ge li gahamano nooambulansa mbali odha li dha landwa,” Ndevashiya ta ti ngaaka.

Momushangwa okwa totha mo kutya uuministeli welongo nawo owa pewa oomilliona N$48, okutunga uundjugo oshowo omihandjo dhoosikola, netompelo lyokukeelela omukithi ngoka.

Ta gwedha po ta ti, uuministeli welongo natango okwa li wa pewa oomilliona N$24, okuandjaneka omeya koosikola dhi li 345 dhokuushayi, okupitila muuministeli wuunamapya, omeya niikwamavi.

Ngoloneya okwa totha mo wo kutya aantu 662 moshitopolwa oya li ya mono omakwatho miikandjohogololo ayihe 12, okuza mooproyeka  dha yooloka dha gandjwa moshitopolwa dhongushu yoshimaliwa oomilliona N$2,34.