Ominista youhaku nonghalonawa Dr Kalumbi Shangula okwa ti omwaalu muhapu wovanhu tava fi kombuto yoCovid-19 inava tunhilwa ombuto.
Shangula okwa ti ovanhu 12 va fya Olomakaya aveshe inava tunhilwa ovenda yoCovid-19, omanga ovanhu va fya Osoondaxa ovashona ashike va tunhilwa.
Minista okwa ti ouministeli wouhaku owa didilika ovanhu vahapu tava fi kombuto yoCovid-19 okudja ketameko lomudo ou.
Edi Shangula okwe di popya Omaandaxa pefimbo a ninga eenghundafana naKundana eshi ta ti kutya Namibia okwa taalela ekufikufi etine eshi omwaalu wovanhu tava kwatwa kombuto yoCovid-19 tau ende wa uka pombada efiku keshe. Okwa ti unene tuu pefimbo lomatango manene ovanhu vahapu ova kwatwa kombuto yoCovid-19 eshi hava kala va ngudumana ve li momwaalu muhapu nokukala yoo vali tava ka pashiyona keenhele da yooloka.
“Otwa limbililwa komwaalu wovanhu tava fi novanhu tava kwatwa kombuto tau ende wa uka pombada efiku keshe,” Shangula ta ti.
Okwa ti oshitukulwa shaMusati osho shimwe sha didilikwa shi na omwaalu wovanhu u li pombada va kwatwa kombuto.
Shangula okwa ti ouministeli otau twikile nokukala tau longo noudiinini nokukaleka po eameno lovanhu opo ku keelelwe etandevelo lombuto.
“Ovanhu nava ye va ka tunhilwe ombuto yoCovid-19 shaashi osha fimana ngeenge omunhu a tunhilwa opo a kale e liamena kombuto,” Shangula ta ti.
Okwa ti oshiwana nashi kale tashi ningi oikonga kombinga yefimano letunhilo lombuto yoCovid-19 opo oshiwana shi kale sha xwaxwamekwa nokukala shi na eudeko nohokwe yoku ka tunhilwa.
Okwa ti moshilongo omu na omiti da wana okutunhila ovanhu komandiki ouhaku a yooloka koitukulwa aishe.
Shangula okwa kunghulila oshiwana opo shi twikile nokuliufa komilandu doCovid-19 shaashi omukifi ou owa nyika oshiponga neenghono.