Omunambelewa omukuluntu muuministeli womindhingoloko nomatalelopo Teofilus Nghitila okwa ti aanyasha ya iyamba okulonga ondhalate yEtosha otaya mono iilonga yaaluhe.

Aanyasha ya pita po40, okuza kendiki lyaanyasha National Youth Services (NYS) oya iyamba okulonga ondhalate yEtosha okukeelela iinamwenyo kaayi gwaye mo.

“Etosha enene, lyi na ookilomita 820. Ihe okwa li kwathanekwa kutya ondhalate ndjoka otayi ka pwa okulongwa muule womimvo ntano  shoka ndali nda tindi,” ta popi ngaaka.

Nghitila okwa ti, omolwa einekelo, oonkondo oshowo eitulemo  lyaanyasha taya longo ondhalate, oya ulike kutya ondhalate ndjoka otayi ka pwa okulongwa muule womimvo mbali.

“Sigo oompaka aanyasha mboka oya longo ko ookilomita 130, shoka tashi ulike kutya otaya longo ye na ehalo yo yi itula mo,” ta popi ngaaka.

Ta gwedha po ta ti, iilonga mbyoka nande nayi ke ye pehulilo momimvo ndhoka, aanyasha mboka itaya ka shuna momapandaanda.

“Etosha olyi na iilonga oyindji, onkene oye na okumona mo iilonga tayi kalelele. Katu na esiku tuya ethe ya shune momapandaanda, shika otandi shi kwashilipaleke,” Nghitila a koleke ngaaka.

Ta ti, elalakano okulonga, onkene natango aanyasha mboka ye li po natango inaya gwana.

Ta popi ta ti, oya pumbwa aanyasha ya thika 70, ya gwedhe yakwawo.

Ngitila okwa ti, nonando aanyasha mboka oye ya netompelo lyokwiiyamba oshoka inaya hala okukala itaaya longo sha, uuministeli ohau ya dhimbulukwa ngaa nokulanda oothewa dhawo.

Omukuluntu gwendiki lyo-NYS Commissioner Felix Musukubili esiku ndyoka okwa popi kutya sigo oompaka oya andjaneke aanyasha okuza mendiki lyawo ya thika 100, taya iyamba mooministeli dhomindhingoloko oshilongo ashihe.

“Shika okwa li twe shi ningi, sho kwa li twa shaina uukumwe pokati kendiki lyo-NYS oshowo uuministeli womindhingoloko,” ta popi ngaaka.

Ta ti, shika otashi ka kwathela aanyasha oyendji okuza momapandaanda okumona iilonga tayi kalelele.

Omunyasha gumwe okwa popi ta ti, nonando kaya li ye na ontseyo kutya iilonga mbyoka otayi kalelele, otaya pandula sho ya ningi aanelago sho ya tothwa mo. 

– vkaapanda@nepc.com.na