New Era Newspaper

Icon Collap
...
Home / Oonakulwa vakulu va hala epangelo li va pe omauwa ahapu

Oonakulwa vakulu va hala epangelo li va pe omauwa ahapu

2021-02-24  Staff Reporter

Oonakulwa vakulu va hala epangelo li va pe omauwa ahapu
Top of a Page

Festus Hamalwa

Ovakondjelimanguluko vakulu otava pula epangelo opo li va wedele ko komauwa oo ve na.
Omauwa oo tava pula okwa kwatela mo ewedelo loshimaliwa, omaumbo e li pamufika wopashinanena nosho yoo omadu okuninga eefaalama.
Oonakulwa vakulu ova li va ninga oshiongi-pitifi, sha li mOngwediva Etivali loshivike eshi shi li koshi yoshipalanyole “okukonga ouwa woonakulwa vakulu nonghalonawa yomaumbo avo”.

Ova ti inava fimanekwa ngeenge tashi ya komauwa oshilongo, ove udite kutya ove li konima yefiya shaashi ova shaala po kexumokomesho. Onghee ova indila omupresidente wongudu yoSwapo pamwe nombelewa yominista woonakulwa vakulu opo a tye ko sha komanyenyeto avo.
Tava twikile vali tava ti, ovanhu aveshe nava talike ko shi fike pamwe ngeenge tashi ya petopolafano louwa woshilongo. 
Umwe womovakondjelimanguluko Nkrumah Mushelenga okwa ti oonakulwa vakulu ova pumbwa okupewa efimano lakula shaashi ova kufa ombinga moita opo Namibia a mone emanguluko.

“Otwa mona oixuna eshi tw ali kombada efimbo loita, emanguluko loshilongo eshi ola tikila eehonde dovanhu vahupu, onghee keshe nakulwa mukulu okwa pumbwa okupewa omauwa opanghalafano shaashi okwe shi lilongela pefimbo loita,” Mushelenga ta ti.
Ova popya kutya oonakulwa vakulu vamwe ova tetekela nale va fiya po ounona vavo, ashike ounona ovo va shaala po ihava mono ouwa washa tau di kepangelo tuu nande.  Okwa yelifa kutya ounona vovakondjelimanguluko ove li tava mono oixuna, hano ve li moluhepo lakula. Vamwe ova hala nokuya keefikola ashike kape na oshimaliwa shoku va futila, onghee ova indila omuleli wongudu yoSwapo opo a tale po nawa poshinima sha tya ngaha.

Ova holola yoo ehandu lavo kutya epangelo okwa li le va u danekela kutya otali va pe oimaliwa yokuninga eepoloyeka davo ashike fiyo onena kape na eshi sha ningwa po. 
Ova ti kutya oonakulwa vakulu ova lwila emanguluko loshilongo shaNamibia, onghee nava pewe omauwa oo tava pula.


2021-02-24  Staff Reporter

Share on social media
Bottom of a page