New Era Newspaper

New Era Epaper
Icon Collap
...
Home / Oonakupilwa omaumbo mOranjemund va yambididwa

Oonakupilwa omaumbo mOranjemund va yambididwa

2022-01-13  Festus Hamalwa

Oonakupilwa omaumbo mOranjemund va yambididwa
Top of a Page

Ovakalimo modoolopa Oranjemund ovo va pilwa omaumbo omafiku aa, ova yambididwa noikulya nosho yo oikwafifo imwe ya wedwa po.

Ovakwashiwana ava ve li ovakalimo kolukanda Bagdad ova li va yambididwa konima eshi va kanifa omaliko avo eshi omaumbo 16 a pya po filufilu Osoondaxa pefimbo lokonguloshi. 

Omakwafoo oo va pewa   ongaashi oikutu, omakumbafa, eembete, oikulya, omaumbo okukala pakafimbo, nosho tuu oikwafifo
ikwao.

Ounona vofikola ve na omidjalo davo da pya po navo ova pewa omidjalofikola neenghaku kOvasamaria ovanamitimanghenda vomodoolopa omo.

Omakwafo a pewa ovanhu okwa yandjwa keefitola da yooloka nokovakwashiwana paumwene. 

Edi oda popiwa komukulunhuwiliki koshikondo shokuninga omapekaapeko nokuyambula po odoolopa Festus Nekayi.  Eshi a ninga eenghundafana naKundana Etitatu okwa hokolola ta ti elelo lodoolopa yaRanjemund, pamwe noshiwana ola ninga eenghendabala domeendelelo opo va yambidide ovanhu va ninga oihakanwa yomundilo.

Nekayi okwa ti moshiponga shomundilo inamu fila omunhu ile mwa monena omunhu oshiponga shaashi ovanhu aveshe ova faduka po eshi omundilo wa tameka.

Okwa hokolola ta ti omundilo owa etwa kombiya ya topa pefimbo omulumenhu umwe a li ta teleke, osho sha eta opo u ndwafukile nokomaumbo ovashiinda. 

Nekayi okwa ti eshi oshili oshikando shotete modoolopa yaOranjemund ta mu holoka oshiponga shomundilo onghee okwa kunghulila oshiwana opo shi kale oupafi nolusheno ngeenge tashi teleke.

Okwa ti kukeshe ou e na ehalo lokuyambaidida ovanhu va ninga oihakanwa yomundilo na kwatafane nombelewa yakansela yomoshikandjohoololo.

– fhamalwa@nepc.com.na


2022-01-13  Festus Hamalwa

Share on social media
Bottom of a page