Minista gwomindhingoloko, omakuti, nomatalelepo Pohamba Shifeta, okwa pititha omushangwa tagu fatulula oondjamba ndhoka dha li dha landwa po oshowo ndhoka dha hupu po.

Shifeta okwa li a fatulula ngaaka shalandula oondjamba ndhoka ndhi li 170 dha li dha tulwa mongeshefa momumvo 2020 sigo oJanuali gomvo 2021.

“Sigo ompaka oondjamba ashike  dhi li 57 dha li dha landwa po, dhoka dha landwa po kaaNamibia mboka oyo ooyene dha dho paife, no ndhi li miikaha yawo,’’ ta fatulula ngaaka.

Ta ti, moondjamba ndhoka 57, oondjamba ashike 37 odho ashike dha ndhindhilikwa dha futwa oshimaliwa ashihe.

Ta fatulula kutya oondjamba ndhi li 22 okwa li dha tumwa koDubai komulandi ngoka omuNamibia omanga ndhi li 15, dha li dha kala moNamibia.

“Ta ti, oondjamba ndhi li 20 ndhoka dha li dha hupu po, natango oyedhina no yategelela dhi futwa oshimaliwa ashihe sha gwanapo,” ta ti ngaaka.

Minista ta ti, uuministeli owa tengeneka okumona oshimaliwa oomilliona N$5.9 ngele oondjamba ndhoka dha landwapo adhihe.

‘’Uuministeli owa li wa tokola okulanditha oondjamba ndhoka okushonopaleka omaupyakandhi haga ningwa koondjamba momahala moka dhali,” ta ti ngaaka.

Ta ti, omaupyakandhi ongaashi omayonagulo giinima yaantu, oshowo omandhipago gaantu. 

Okwa konekwa oondjamba tadhi indjipala shinene moNamibia okuza momumvo 1995.

Omvo gwayi okwayalulwa oondjamba dha indjipala moNamibia alihe, okuza pomwaalu 7 500 ihe nena  odhi vule 23 700.

Ndhoka okwa li dha pitithwa kuShifeta, esiku kwa li a eta puuyelele noku fatulula etengenekothaneko lyokukondolola onkalo yiiyamakuti ooshowo omilandu dho mahala giiyamakuti ga gamenwa.

“Oondjamba inadhi indjipala ashike momwaalu, ihe odhayi natango ko mahala  gamwe moshilongo,” ta ti ngaaka.

Shifeta okwa ti, okwa ndhindhilike kutya oondjamba odha li dha indjipala okuza mo2012, sho ondjala ya li ya holoka, shoka kwa li sha thiminike oondjamba dhi kathike ko mahala inaadhi pitikwa.