New Era Newspaper

New Era Epaper
Icon Collap
...
Home / Oondjila adhihe muAguste okonooli dhu uka

Oondjila adhihe muAguste okonooli dhu uka

2022-07-27  Victoria Kaapanda

Oondjila adhihe muAguste okonooli dhu uka

Okuza momasiku 26 Aguste sigo omasiku 01 gaSepetemba nuumvo, oondjila adhihe okoonoli dhu uka, sho taku kala omauliko giipindi oshowo omaudhano nomainyanyundho ga yooloka.

Oshitopolwa shaShana opamwe noshifokundaneki shoThe Namibian oshowo elelelo lyondoolopa yaNgwediva, oya longekidha iinyangandhalwa tayi ka kala ko miiwike ya hugunina yaAguste. Iinyangandhalwa mbyoka oya kala hayi longekidhwa omumvo kehe, ihe omimvo mbali dha piti, okwa li ya kalekwa omolwomukithi gwoCovid-19.

Ashike nuumvo, epangelo olya kutha po omangambeko agehe goCovid-19, oshinima shoka sha mangulula iipindi nomaudhano.

Aakalelipo oshowo mboka taya longekidha ekopi lyoshifokundaneki shoThe Namibian oya ti, mboka ya hala okuninga omayindilo gokumona uutala wokulanditha, oya manguluka okuninga omayindilo.

“Mboka taya ka landitha inaya pitikwa oku ka landitha iikolitha, netompelo kutya omaundhano ngoka oga nuninwa aanyasha oshowo aanasikola mboka inaaya pitikwa okunwa iikolitha,” ya fatulula ngaaka.

Taya ti, omayindilo ngoka otaga ka hula momasiku 29 gaJuli. Oofoloma otadhi kotha N$100, mbyoka itaayi ka galulwa nando.

“Kuuyelele wa gwedhwa po, kwaamboka ye na ehalo okuninga omayindilo naya thike poombelewa oonene dhoshitopolwa mOshakati,” taya ti ngaaka.

Ekopi lyoshifokundaneki shoThe Namibian otali ka kala ko momasiku 26 sigo 29 gaAguste.

Ngoloneya gwoshitopolwa shaShana Elia Irimari okwa ti, ekopi ndyoka ta li ka kondjelwa koosipana ndha yooloka, okuza kombinga adhihe dhoshilongo nomaudhano ga yooloka, otadhi ka kutha ombinga, okuza ketanga lyokoompandhi, etanga lyomokambamba nosho tuu.

Irimari okwa li a fataulula ngaaka esiku kwa li ta fatululile aatolinkundana kombinga yelongekidho lyomaudhano ngoka.

Omaudhano ngoka otaga ka dhanwa kohi yoshipalanyolo “Okuxwaxwameka nokukalekapo omaudhano”.

“Uundhano mboka itau ka eta ashike enyanyu lyomaudhano moshitopolwa, ashike, ihe otauka taandelitha eliko lyoshimaliwa moshitopolwa, pamukalo gokulanditha,” ta ti ngaaka.

Omalengekindho agehe oge li metifa, mwa kwatelwa okapale hoka kwa li ka tamekwa oku opalekwa omwendhi gwayi. 

Omihandjo oshowo omalukalwa gaandhani nago oga longekidhwa.

Omauliko giipindi mOngwediva ngoka haga hili wo aantu okuza kondje yiilongo, nuumvo otaga ka kala ko momasiku 26 gaAguste sigo 01 Sepetemba.

Omumvo gwa yi okwa li ga ningwa okupitila komalungula omanga momumvo 2020 kwa li natango ga kalekwa.

Omupopiliko melelo lyondoolopa lyaNgwediva Jackson Muma okwa ti, nonando oCovid-19 natango omo yi li mokati ketu, omauliko giipindi otaga ka ningwa mesimaneko lyoompango nomalandulathano gokukeelela omukithi ngoka.

“Elalakano lyetu, okugalula eliko lyoshimaliwa, ndyoka lya gu pevi oshowo okugalula oongeshefa ndhoka dha li dha pata,” Muma ta ti ngaaka.

Ta ti, omawuliko giipindi gomOngwediva, ompito ombwaanawa kaanangeshefa oshowo komahangano ga yooloka, oku ulika uunongo niilonga oshowo okushingitha iilandandithomwa yawo.

Omawuliko giipindi mOngwediva okwa li ga patuluka lwotango momumvo 2000, nonuumvo oge li kohi yoshipalanyolo “Okugalula mbala eliko”.

“Iipindi mbyoka ohayi gongaleke aanangeshefa oshowo aantu ya za ko kule, taya ulikilathana uunongo niilonga yawo, mehala limwe,” ta popi ngaaka. 

Muma okwa ti, nuumvo oya tengeneka okukala yena aawuliki yiipindi ye vule 300, okuza koombinga noombinga oshowo taya zi kondje yiilongo.

Ta ti, elalakano okugandja ompito kaanangeshefa oshowo ko mahangano guulike iishingithomwa yawo oshowo okugalula eliko mondoolopa yaNgwediva oshowo moshilongo ashihe. 

Omawuliko giipindi otaga ka ulika iilandithomwa ayihe okuza kiikulya, kiizalomwa na kehe shoka hashi vulu oku etwa po noonyala oshowo oku eta oombelewa hadhi gandja omayakulo ga pumba po pepi.

Muma okwa ti, omawuliko giipindi go numvo otaga ka kala ga yooloka komakwawo, oshoka otaga ka gandja wo ompito natango no kaanangeshefa mboka itaya vulu okuthika.

“Ota tu ka ulikila mboka itaaya vulu okuthika, okupitila ko mathano gokomalungula gwopashinanena,” ta popi ngaaka.

Ta ti, shoka otashi ka kwathela okuulikila mboka itaaya vulu okuthika, no yena ehalo lyoku tala oshowo okuulika iilandithomwa yawo.

Omayindilo okumona ompito yokuulika iipindi mOngwediva oga hula nale muMei nuumvo, nongaashi ngeyi elelo olyi li metifa okulongekidha oshiindingili shoka.

– vkaapanda@nepc.com.na


2022-07-27  Victoria Kaapanda

Share on social media