New Era Newspaper

Icon Collap
...
Home / Oondongi dha hwamekwa omulilo dhi na omwenyo

Oondongi dha hwamekwa omulilo dhi na omwenyo

2021-06-03  Victoria Kaapanda

Oondongi dha hwamekwa omulilo dhi na omwenyo
Top of a Page

Opolisi moshitopolwa shaShana otayi indile moshigwana ngele ope na ngoka e na uuyelele kombinga yaamboka ya hwameke nokufika oondongi momukunda Oshiteni mOndonga.

Omupopiliko gwopolisi moshitopolwa shaShana Thomas Aiyambo okwa ti, oya li ya mono okavidio taka taambathanwa komalungula, moka mu na aantu taya dhimi omulilo tagu fike oondoongi.

“Mokavidio omu na oondoongi ne, dha mangelwa oomwiidhi komishila nomulilo gwa tema. Oondoongi odha pya okuza komatako sigo omombunda,” Aiyambo ta ti ngaaka.

Ta ti, kehe ngoka e na uuyelele kombinga yoshiningwanima shika na lopotele opolisi yi li popepi naye, opo aantu mboka ya mangwe po.

“Oshiningwanima shoka osha puka noshiwinayi, iimuna oshike tayi fikwa yi na omwenyo?,” ta pula ngaaka.

Mokavidio moka natango omu na omukiintu ta popi, newi lyohenda oshowo olukeno sho a mono oondoongi  tadhi ulu kokululuma, e taye dhi dhimi.

Opolisi natango oyi li molukongo lwaafuthi mboka ya li ya yaka po ohauto yoCorolla petameko lyoshiwike shika, nokwa li ya adhika moAngola.

Aiyambo okwa ti, ohauto ndjoka oyi li miikaha yopolisi yaAngola, noyi li metifa okugalukila kumwene.

Ohauto ndjoka okwa li ya yakwa po uusiku wOmaandaha mOshakati molukanda Okandjengedi.

“Otaku hokololwa kutya ohauto okwa li ya yakwa pegumbo sho mwene a li e yi thigi e yi paakinga, naasho a ka penduka ongula yEtiyali, ine yi adha po pondje,” a hokolola ngaaka.

Ta ti, ngoka e na uuyelele kombinga yoshiningwanima shoka na dhengele opolisi yi li popepi naye meendelelo.

Nonando kehe momwedhi nenge konima yoomwedhi mbali otamu lopotwa aantu taya yugwa iimaliwa konima yokunana moombaanga onene, opolisi oya ti oya dhidhilike kutya aantu mboka ohaya landithwa po kaapambele yawo.

“Kehe esiku otandi kumagidha oshigwana kutya inashi nana we iimaliwa iinene moombanga nenge ye li oyo ayeke, naya longithe uumboba okulunda,” ta ti ngaaka.

Ta ti, oya ndhindhilike aakulupe oyo haya kuthwa iimaliwa unene oshoka aatekulu yawo nenge aapambele yawo oyo haya gandja uuyelele kaafuthi.

“Ngele otaya ka landa sha pehala kapu longithwa uumboba okulanda, tango naya pite kopolisi yi li popepi nayo opo ya pewe aapolisi mboka taye ya thindikile,” ta kumagidha.

Aiyambo okwa kumagidha oshigwana shi ikaleke kokule nokukala momakwatathano gwopangodhi naantu kaaye ya shi, mboka haya kengelele aantu kutya otaya dhenge okuza komahangano gontumba.

“Inamu gandja we uukwatya wuuthemba weni ku kehe temudhengele nokufundjwa kutya anuwa omwasindana. Iindeni mukathike komahala hoka neyene. Aafuthi otaya longitha omikalo adhihe okumuyuga, onkene kotokeni,” ta popi ngaaka.


2021-06-03  Victoria Kaapanda

Share on social media
Bottom of a page