Victoria Kaapanda
ONGWEDIVA-Opolisi moshitopolwa shaShana oyi li molukongo, lwaafuthi mboka ya iteeyele mositola tayi ithanwa Direct Auto, dhoka dha yi noshimaliwa shi vule N$ 23 000 mOngwediva.
Omupopiliko nomugandji gwomauyelele moshitopolwa shaShana Frieda Shikole okwa ti oshiningwanima shoka oshali sha holoka konguloshi yEtiyali potundi 02h30 yongula .
“Oongangala dhoka odha iteyele mositola ndjoka hayi landitha iitenda yoohauto, eta dhi falele ompungulilo yiimaliwa ndjoka ya li yina oshimaliwa shithike poondola N$ 23000 koomuma oshowo iitenda yoohauto yimwe, yongushu inaa yi shuwika natango,” Shikole ta ti ngaaka.
Okwa popi kutya pethimbo onkundana ndjika ya pitithwa kape na ngoka a tulwa miipandeka, ihe opolisi otayi indile moshigwana kehe ngoka ena uuyelele mpoka pena mboka yalonga iilonga mbyoka a kale a lopotela opolisi yo popepi naye.
Oshiningwanima shafathana, omaandaha gwoshiwike shika, oongangala odhali dha ponokele ositola yedhina Okadhitya Outlet noku yuga omulandithi imaliwa yithike N$ 9, 825.
Shikole okwa ti oshiningwanima shoka oshali sha holoka potundi 07h00 Omandaha, molukanda Oshoopola muningino wOshakati.
“Omufuthi gumwe okwali a kuthile omukiintu ngoka ta dhenge eshina ekatana, e te mu lombwele tati na gandje iimaliwa ayihe nongodhi ye yo peke omanga ine mu shashala nekatana ,” Shikole a popi ngaaka.
Omupopiliko gwopolisi ndjoka okwali a hokolola kutya miipotha ayihe yopaali kapu na shoka sha monika po sigo onena, no kapuna woo ngoka omangwa nenge a tulwa konima yekumba sigo ongashingeyi, nomakonakono gwopolisi oge li metifa.