OMPUNDJA - Oongundu ntano dhopapolitika otadhi ka taalelathana sho tadhi ka kutha ombinga momahogololo guukansela moshikandjohogololo shaShakati East moshitopolwa shaShana momasiku 24 Aguste 2019. Omahogololo ngaka ga gwedhwa po oge ya konima sho ngoka a li nale kansela Lotto Kuushomawa a li a si muMai nuumvo.
Ta ningi etseyitho mOmaandaha, omunambelewa gwokakomisi komahogololo (ECN) gwoShakati East Efraim Iiyambo, okwa ti oongundu odha shangitha nale ekuthombinga dhadho oshiwiwike sha za ko nokakomisi. Oongundu ndhika odha kwatela mo Congress of Democrats (CoD), Popular Democratic Movement (PDM), Swanu, Swapo osho woNamibia Economic Freedom Fighters (NEFF). Ta gwedha po wo kutya Fiina Kuutondokwa ota kutha ombinga wo naye momahogololo ogo tuu ngoka onga omukuthimbinga i ithikamane. Elias Iiyambo oye okandidate yoCoD, Theofelus Kamati ogwoPDM naRebecca Kambayi gwoSWANU. Okandidate yoNEFF oFestus Shaduva omanga yoSwapo oAbner Shikongo. Indeni mu ka ninge omahwahwameko kaaku na we opo aantu yaa ikaleke kokule nomahogololo ngaashi sha li koshikandjohogololo shOndangwa Urban,” Iiyambo ta ti sho a li ta popi naakalelipo yoongundu mbaka. Maantu mboka ya li yi ishangitha ye li 16 000, aantu ashike ye li konyala 4000 ya li ya kutha ombinga momahogololo ngoka ga li kOndangwa omwedhi gwa za ko. Iiyambo ta tseyitha wo kutya otapu ka kala oosenda 21 dhokuhogololela dhi li moshikandjohogololo ashihe. Edheulo lyaanambelewa yomagololo otali ka tameka mo16 sigo 22 Aguste, omanga iilongitho yomahogololo tayi ka thika moshikandjohogololo mo23 Aguste okuza koWindhoek.
(NAMPA)
