New Era Newspaper

Icon Collap
...
Home / Oonkoshi dha andjakana moshitopolwa shaKunene omolwondjala

Oonkoshi dha andjakana moshitopolwa shaKunene omolwondjala

2021-04-23  Victoria Kaapanda

Oonkoshi dha andjakana moshitopolwa shaKunene omolwondjala
Top of a Page

Uuministeli womidhingoloko, omakuti nomatalelepo owa ti owa tuma aaniilonga yawo opo ya ka pondole onkalo  yokugamena oshowo okukeelela oonkoshi ndhoka dha andjakana moshitopolwa shaKunene omolwondjala, kaadhi longele oshigwana  uuhwapindi. Omupopiliko muuministeli womidhingoloko Romeo Muyunda okwa ti, ongaashi naana onkalo ya ndhindhilikwa kutya oshitopolwa shaKunene osha li sha ponokelwa kondjala, noonkosho odha li dha halakana noshitopolwa shoka, kaadhi wete iithitukuti yokulya.

“Aanambelewa mboka ya tumwa momakuti moka otaya longo nuudhiginini okukeelela oonkoshi ndhoka kaadhi holole uuhwapindi nokulya po iimuna yaanimuna moshitopolwa moka,” ta ti ngaaka.

Muyunda okwa ti, oonkoshi dhimwe odha nyayika komalutu omolwuukulupe nokondjala, oshoka kadhi wete iithitikuti dhi lye. “Shoka otashi vulu oku eta uupyakadhi, oshoka odha sa ondjala nodha hala okuponekela iimuna oshowo aantu ngele dha si ondjala unene,” a popi ngaaka.

Ta ti, uupyakadhi mboka owa li wa thiminike uuministeli womidhingoloko opo u tote po omulandu  tagu ithanwa “ Lion conservation and management plan” nkene ye na okukala taya longo noonkoshi uuna uupyakadhi wa tya ngaaka tawu holoka.

Muyunda okwa popi ta ti, oya thaneka okulundulula oonkoshi komahala hoka ku na iithutikuti, hoka tadhi vulu okukala kaadhi na uupyakadhi. “Otandi kumagidha aanafaalama ya kale kokule noonkoshi ndhoka, kaaye dhi pe okulya uuna ye wete dha sa ondjala. Shoka inashi ningwa kaape na epitikilo okuza kuuministeli womidhingoloko. Oonkoshi odha nika oshiponga, otadhi vulu oku mu ningila omiyonena noku mu dhipaga,” a kumagidha ngaaka.

Ta ti, momasiku 03 gaApilili nuumvo, onkoshi yimwe oya li ya dhipagwa kuuministeli sho ya li ya ponokele ofaalama yimwe, nokulya po iimuna yi li 13, ombwa oshowo oondjuhwa, momudhingoloko Anabeb moKunene.

Ta gwedha po ta ti, oonkoshi ndhoka kaadhi na oonkondo kudho dhene, nenge tadhi ehama ohaye dhi dhipaga.  

Momasiku 18 gomwedhi nguka natango oya dhipaga onkoshi yimwe momudhingoloko Mbakondja, kwa li yaa na oonkondo dha sha okwiinyenga kuyo yene, nokakwa li tayi vulu  okuponokela iimuna naantu ye li popepi nayo.

Sigo onena, inadhi ponokela nenge dhi monithe  omuntu oshiponga.


2021-04-23  Victoria Kaapanda

Share on social media
Bottom of a page