ONGWEDIVA - Immanuel Uugwanga a yambukile momukunda Onamukulo mOhangwena ota ti okwa kwatwa komadhilaadhilo omawinayi sho a ningilwa omiyonena kuhekulu.
Ta pula kutya, otaya uka peni naamwiiyina oshowo aamwayinagona ya thigwa megumbo kuyinakulu ngoka a si ko nale.
“Ondi uvite uudhigu nda tungila memegona ongulu, ihe ongulu ndjoka oya kumunwa po oshoka aniwa itandi vulu okutunga megumbo lyakuku, oshoka olya pewa po tatekulu,” Uugwanga ta ti ngaaka.

Egumbo ndyoka olya li lya pewa po omulumentu gumwe, omwana gwanakusa mwene gwegumbo
Uugwanga ta ti oya lombwelwa kuhekulu ngoka a hokana, noku na iitala pepata momwedhi tagu ya kutya kaye na uuthemba okutunga megumbo oshoka kali shi we lyayinakulu ihe olya hekulu ngoka paife.
Ta pula kutya otaya yi peni  ngele megumbo moka omo ya valelwa kaye na we egumbo limwe lyi li po. 
Oshike ngu a hokana oye itaa thigi po egumbo e ta ka konga epya  negumbo lye e ta thigile aatekulu ye egumbo oshoka  kaye na mpo taya uka.
Megumbo moka omu na natango oyana yomukulupe nakusa mwene gwegumbo. Uugwanga okwati oku uvite uudhigu oshoka okwa epeka iimaliwa ye.

Uugwanga okwa ti shoka a ningilwa oshe mu uvitha nayi, nangaashingeyi oku na omadhilaadhilo ogendji omawinayi.
Kapatashu gwomomukunda Onamakulo John Hamukwata okwa koleke kuKundana ta ti oshiningwanima shoka sho sha li sha ningwa opo a li, nokwe shi mona lela nomeho ge. 

“Ongulu ndyoka ya hanagulwapo oya li okalili komukulupe mwene gwegumbo, ihe mOshiwambo otaku ti ngele mwene gwegumbo a si, omweelo ohagu lundululwa, sho shoka osho nee Uugwanga a li inaa hala oku uva ko,”  Hamukwata a fatulula.
Ta ti, “omumati ngoka okwa kala nokulombwelwa kaakuluntu kutya, ina tsikila okutunga okalili kayinakulu oshoka eyelo oli na okulundulwa. Okwa iningi itaa pitwa momutse, naa shoka osho sha etitha ongulu yi kumunwe.”