Aanasikola yaakadhona yoosikola dha yooloka moshikandjohogololo shEtayi moshitopolwa shaMusati oya yambidhidhwa nuuikwathitho womathimbo kehangano tali ithwa Trifain Shipo, sha ningwa Etitatu.
Oosikola dhi li omulongo odha li dha yambididhwa nuuikwathitho womathimbo wu li 600 awuhe kumwe mboka wa li wa kotha ongushu yoshimaliwa N$500.
Kansela gwoshikandjohogololo shEtayi Hans Haikali okwa ti oya li ya andjaneke koosikola ngaashi Etayi, Enoleu, Shafombambi, Onheleiwa, Omutundungu, Akayupa, Oshipya, Okaleke, Opawa oshowo Iipanda yamiti.
“Oproyeka ndjika oya totwa po okukwathela aanona yaakadhona mboka ya taalela omashongo ogendji. Aanasikola oye na okuyambidhidhwa okukaleka moosikola,” ta fatulula ngaaka.
Ta ti, nonando awuhe itau ka gwana aanasikola ayehe, otau ka kwathela ngaa mboka ye li mompumbwe unene.
“Aalongwa oye na okukalekwa mosikola, uuna taya yambidhidhwa, nana otaku shonopeka omaupyakadhi oshowo omashongo ya taalela.,” Haikali ta ti ngaaka.
Oyendji oya thigi po oosikola omolwomatompelo ga yolooka, nonando taga vulu okukandulwa po.
Ta ti, ohashi kwathele uuna omaupyakandhi ge shiwike taga vulu okuholoka, taga tsakanekwa ondjilakati, opo kaaga holoke we nande nande.
“Aakuluntu yamwe momagumbo kay ena iiyemo, onkene ohashi kala oshidhigu okulanda uututa waanona yawo. Uuna ya adhika kuudhigu mboka koosikola, ohashi ya shololitha omolwohoni, sigo ya thigi po osikola,” ta popi ngaaka.
“Otandi kumagidha natango aanona yaakadhona, ya kale aluhe yi ilile po, uuna ya mono mukwawo e li muupyakandhi mboka, naya kale taya yambidhidhathana, okukaleka yakwawo mosikola,” ta kumagidha ngaaka.
Haikali okwa kumagidha wo aanangeshefa ya kuthe oshiholelwa shoka okuyambindhidha aanona yosikola oku ya kaleka moosikola.
Oshigwana osha kala nokugandja omayele komalungula kutya uututa owa pumbwa okukala tawu hawalekwa kepangelo poosikola, unene oosikola ndhoka dhi li kuushayi.
Omulongisikola gumwe goposikola mpoka okwa li a pandula ehangano ndyoka, oshoka shoka olya longo lela sho lya eta po elunduluko enene mokati kaalongwa.
– vkaapanda@nepc.com.na