Nonando oosikola adhihe moshilongo odha pitikwa okutameka nena, 26 Januali, oosikola dhimwe monooli odha kaleke aalongwa kaaya tameke oosikola esiku lyotango omolwomatompelo ga yooloka.
Minista gwElongo Anna Nghipondoka oshiwike sha zi ko okwa tseyitha kutya oosikola adhihe otadhi tameke oshita nena.
Ta ti, shoka okwa li sha tokolwa oshoka omulandu gwa li gwa longithwa omumvo gwa yi, konima yepato lyoshilongo omolwa oCovid-19, okwa li gwa yonagula elandulathano lyelongo.

“Omilandu dha li dha longithwa, okwa li dha thiminike aalongwa ya thige po oosikola, oshoka hakehe gumwe a li e na ompito yokwiilonga okupitila pawungomba,”Nghipondoka ta ti ngaaka.
Ta ti, aalongwa ye li 3 625 oya li ya ningi omapunda, moka muna aalongwa yokoshitopolwa shaMusati ya dhidhilikwa yena omwalu gu li pombanda naalongwa ye li 562 taku landula oshitopolwa shaKavango shokuninginino  ye li 522.
Nghipondoka ta ti, omvula ndjika itaya kalandula omilandu dhoka, oshoka otadhi shunitha aalongwa monima, onkene aalongwa ayehe oya tegelelwa ya tameke oosikola petameko mpaka lyomumvo.

Oosikola odhindji odha pititha omatumwalaka moradio kutya, omolwa omukiithi gwoCovid-19 tagu ende gu uka pombanda gwo itaagu ti po hwepo, aalongwa  otaya tsikile okulongwa muungundu okushunitha omwaalu gwaalongwa mongulu yimwe pevi.  Minista okwa gwedha po ta ti, epangelo otali tsikile okugandja ikeelelitho yoCovid-19 koosikola okulwitha omukithi ngoka. Moonkundathana naKundana Anneli Shivute omulongisikola omukulu, ngoka e li moshipundi shevululuko ngashiingeyi okwa ti, aanona naya shune kosikola.
“Omukithi gwoCovid-19 gu li mokati ketu, natu gu taambii ko ee tatu ilongo okuza nago. Itatu kala naanona itaayi koosikola, omanga pena omalandulathano taga vulu okukeelela omukiithi ngoka,” Shivute a popi ngaaka.

Ta kumagidha aavali ayehe ta ti, omukithi nguka nagu kale oshilongwa hashi longwa kaavali okuza momagumbo.
Ta ti, aavali naya kambadhala okulonga nokuuvithako aanona omukithi ngoka, nankene yena okwiikelela ku go.