Nonando omukithi gwoCovid-19 otagu ende gu ukapombanda moshikondo shelongo, omukuluntu gwelongo Sanet Steenkamp okwa ti natango kaye na edhiladhilo lyokukutha onkatu oosikola dhi pate. Omukithi gwoCovid-19 ogwa lopotwa guuka pombanda unene moosikola, moshitopolwa shaKhomas.
“Uuministeli welongo otawu longelo kumwe nuuministeli wuundjolowele okuninga omapekaapeko oshowo okukondolola omukithi ngoka momidhingoloko dhoosikola,” ta ti ngaaka.
Steenkamp okwa ti, oya dhidhilike kutya omukithi gwocorona ohagu ziilile unene komagumbo, onkene ngele oompango nomalandulathano odha simanekwa poosikola, Covid-19 itayi taandele unene moosikola.
Ta ti, uuministeli owa kumagidhwa kaawu pate oosikola ethimbo ele oshoka ka pena etompelo lyongushu.
“Omukithi nguka otagu lopotwa tagu taandele unene moshitopolwa shaKhomas, onkene otwa kutha onkatu opo tu patithe oosikola dhoka dha ningi iihakanwa, dhi patwe po kathimbo etadhi katsikile ko nima dha opalekwa,” ta popi ngaaka.
Steenkamp ta ti, shoka shina oshilonga elongo lyi tsikile okuya komeho.
Otashi kwathele shike okupata oosikola adhihe ngele oosikola dhimwe inadhi lopatwa nande oshipotha shimwe sho corona. “Inatu kutha ashike omatokolo kutse yene, ashike otuna ookomitiye muna iikando ya yooloka tayi kondolola omukithi nguka, mbyoka yetu kumagidha tukuthe etokolo ndika, “ Steenkamp ta ti ngaaka.
Tagwedhapo ta ti, oondunge ihadhigwanene omutse gumwe, onkene otatu ka pulakena ko mayele oshowo ko magwedhelepo okuza moshigwana.
Ta ti, omwedhi gwayi uuministeli welongo pamwe nuuministeli wuuhaku okwali wa ningi omapekapeko noku pula aalongwa ye vule 1100 kombinga yetaandelo lyomukithi nguka noku kutha onkatu yili mondjila okugukeelela.
Steenkamp okwa ti aalongwa yeli 527 oshowo aalongi yeli 165 oya kwatwa komukithi gwoCovid-19, ngaashingeyi oyi ikalekelwa, ihe ka yeli koosikola.
Ta ti, oosikola dhimwe odha patwa pakathimbo, ihe otadhi ka patuluka konima dha manwa oku opalekwa.
“Otandi kumagidha aalongwa kaaya sholole, ihe ya tsikile noku gwanithapo omalandulathano noompango okukeelela omukithi ngoka,” taku magidha.
Omwaalu gwiipotha yuuka pombanda moosikola ogwa mbandaleke wo aakuluntu yamwe, unene mboka yeli ko kule naanona yawo.
Uuministeli wuuhaku momushangwa pitithi owati, aantu ye vule 920 oya si komukithi gwocorona, okuza esiku gwaponokole moNamibia.