Oositola tadhi landitha iilongithomwa yosikola, odhi na omikweyo dha tsa pondje dhaavali taya landele aanasikola, mboka taya tameke osikola oshiwike tashi ya. 

Pakalindeli kosikola, oosikola otadhi tameke ootundi mEtitatu momasiku 11 gaJanuali. 

Sho aalongwa ya li ya pewa omishol ondondo dhiilongithomwayenaokufaalela nuumvo petameko lyosikola, aavali oya tondokele koositola ya gwanithe po omisholondondo ndhoka. 

Kundana sho a li a piti positola tayi ithanwa Waltons mOshakati okwa li a mono aavali yamwe yeli momukweyo omuleeleka yena iilongithomwa ya yooloka pomake. 

Ositola ngaashi Pep, Jet oshowo Shoprite nandho onduudha aavali taya landa iilongithomwa yosikola. 

Selma Shivute ngoka naye kwali eli momukweyo ngoka omule mositola yoWaltons a za komukunda Onkani okwa ti, okuuvite nayi oshoka ota longitha oshimaliwa oshindji, okuya kondoolopa oshoka iinima mbyoka tayi pulwa koosikola kayiko koositola dhili popepi onkene okuna okuya koWaltons nenge koGame. 

“Oosikola otadhi pula iinima oyindji unene, otayi tumonitha iihuna. Ngaye ihandi longo ihe okavenisa kandje tandi mono mokapana kandje okuuka ashike minima yosikola,” ta nyenyeta ngaaka. 

Ta gwedhapo ta ti, shika oshininma hashi holoka omvo kehe , no haya nyenyeta uupyakandhi mboka omvo kehe ihe epangelo itali lundulula nando. 

Simon Shekunyenge ngoka kwali talanda iinima yaanona ye yokosikola mositola Pep okwa ti, oya ndhigupalelwa kuudhigu mbuka omvo kehe. 

“Ondina aanona yeli yahetatu, ihe ayehe otaya pumbwa omayambindhindho giilongithomwa yosikola. 

Ondili muudhigu, yakwetu epangelo nali yambindhindhe, wo mpoka tai vulu” ta ti ngaaka. 

Ta ti, kaashi ivule osikola yi kale hayi futwa, oshoka paife epangelo olye tu tenteke ashike uundhigu. 

“Paife ohatu longitha oshimaliwa oshindji unene shi vulithe nale, sho aanona kwali haya pewa omambo koosikola,” Shekunyenge ta popi ngaaka. 

Ta gwedha po ta ti, oosikola ndhepangelo paife kadhi ivule naandhoka dhopaumwene, odha ninga ondilo. 

“Epangelo nali ete po elunduluko,” ta indile. 

Omukiintu gumwe gomimvo dhopokati okwa popi ta ti, oositola oyuudha noonkondo. 

“Ondeya po nale mpaka, paife onda ninga po oowili dha thika ku mbali, ihe ine mona natango ekwatho. 

Ositola oyu udha unene,” omuvali gumwe ta ti gaaka. 

Ta gwedha po ta ti, ositola ndjika otuna okuyi kalela oshoka oyo yina iilongitho oyindji ya nyolwa momusholondondo gwa tumwa alongwa koosikola, oshowo oondando dhayo odhishi okwiindhindhimikilwa. 

Aavali ohaya lombwela ya lande iinima yaanona omanga inaya ya mefudho, okuyanda omaupyakandhi gatya ngiika. 

Kundana sho kwali a ningi omapekapeko moositola ndhimwe hadhi landitha iinima yoosikola, ngaashi Pep, Shoprite, Jet, Game nandho okwali ndhi na omikweyo omileeleka. vkaapanda@nepc.com.na